Leyla Guvena ke seba şikitişê tecrîdî 62 rojî yê grevê vêşanîye de ya vat, “Tecrîdê serê Ocalanî tecrîdêko hemverê heme merdimîye de yo. Ganî ma nê tecrîdî vindarnê, vengê xo bi mucadeleyê xo berz bikerê.”
Hemsereka Kongreya Cimatî ya Demokratîke (KCD) û parlamentera HDPyî yê Colemêrgî Leyla Guvene ard ziwan ke a do hemverê tecrîdê serê Rayberê Şarê Kurdî Abdullah Ocalanî de bêveng nêmano û roniştişê 7ê Teşrîna peyêne de ke bi SEGBÎS tewrê ci bîbî vatibi “Heta tecrîdê serê Ocalanî wedarîyo” a do bedenê xo bido serê vêşanîye.Guvena ke halê ci resayo dereceyêka krîtîke persê Servîsa Cinîyan a Medya Haber Tv cewab kerdî.
Guvene nê vatî: Mabênê ruh û bedenê merdiman de hemsencî esta. Serkêşîya na hemsencî destê ruhî de ya. Gama dewlemendîya ruhî bena vêşî rixmê bedenî de zî kontrol keweno destê şexse. Mi naye zaf rind fam kerde ke her çend dewlemendîya ruhî gama çalakîye de aver şina, verê çalakîye merheleya hadreyîye zî muhîm a. Gama ke hadreyî bihêz bê hewna ke şexse çalakî pratîk de nêramojnena zî serfirazî bi dest fînena. Qe mebo mi wina tecrube kerd.
Ez qaso ke verî qe nêbîya hende bihuzûr a
Tarîx de derwîşê ke wazenê cewherê cuye fam bikerê sere de waştişanê bedenê xo kontrol kenê. Nê tradîsyonî xo xoverdayîşê Zîndanê Amedî de ramot. Goreyê mi yewna nimûneyê xoverdayîşê 14ê Temmuze çinyo.
Eke ez halê xo yê nikayênî vajî ruhê mi bicoş o. Ez qaso ke verî qe nêbîya hende bihuzûr a. Ez eşkena vajî seba ke cehdê min ê fikir, zikir û çalakî bîyo yew ez bişans a. Çîyo ke nê ruhî keno pîl girêdayîş û bawerîya amacî ya. Bêguman kiriştişê nê ruhî teberî rê mi hîna keno keyfweş.
Bêveng mendiş hemparîya sûcî ya. Bêvengî pasîfî ya. Tecrîdo ke serê birêz Ocalanî de yeno bicaardene hemverê heme merdimîye de yeno bicaardene. Birêz Ocalan kesêko polîtîk o. Îradeyê Kurdan o sîyasî yo. Dinya ganî nê nêvînayîş ra mero. Ez seba nê xo ver dana. Ganî ma bê ke wext vîndî bikerê tecrîdî vindarnê, mucadeleyê xo berz bikerê.
Şarê ke na coxrafya de ciwîyayêne verî zî bi desan reyan faşîzm bin fîna. Ez vana ke nika tam wextê mucadeleyî yo, vero ke ma hîna zaf bedelan bidê biresê serfirazî. Eke tecrîd wedarîyo ma do nefes bigîrê, mergî do vindarîyê. Ez naye ra zerrî ra bawer kena.
Ewro na seserra 21. de problemo tewr gird hewna zî problem cinîyan o. Sewîyeya azadîya cimatêk goreyê sewîyeya azadîya cinîyan o. Birêz Ocalan hetê tarîxkî-cimatkî yê cinîyan zaf hetan ra gêno xo dest û perspektîfanê çareserî ano ziwan. Birêz Ocalan vano ‘Tarîxo îdeolojîk ê cinîyan hewna nênûsîyayo, tarîxê azadîye zî seba nûsîyayîşî paweno. Cimatê Kurdan de hetêk ra ercê komunalî ke serkêşîya ci cinîyî kenê aver de yê, hetêna ra zî îradeyê înan hetê aqilê camêrdî û destê camêrdî ra ameyo bindestkerdene. Cinîya ke amîya bindestkerdene zî eslê xo de merde ya.
Cinîya ke nêeşkayêne vejîyo kuçeyanan, koyan de wareyê azadîye afernayî
Rayberê Şarê Kurdî Abdullah Ocalanî na raştîye dîye û mucadeleyê azadîye de mucadeleyê cinî sey meseleyêkê serekeyî girewto xo dest. Bi mucadeleyê azadîye ya cinîyan cinîyê ke nêeşkayêne keyeyê xo ra vejîyê teber, bêîrade ameybî verdayene netîceyê nê mucadeleyî de averşîyayîşê şorişgêrî vetî meydan. Raştîya cinîya koleye serûbin bîye. Herinda ci de cinîya ke wayîrê îradeyî ya û wayîrê nasnameyî ya vejîyaye meydan. Cinîya ke keye de bîye vejîyaye meydanan, kuçeyan û serê koyan.
Kitabê ‘Kürt Siyasetinin Mor Rengi’ (Rengê Sîyasetê Kurdan o Mor) de çîyê ke ameyê ciwîyayene heme cîya cîya nûsîyayê. Kurdistan de nasnameyê cinîyan bi xatirê fikiranê azadîyan ê birêz Ocalanî de vejîya werte. Mi sey cinîye Kurde xo wina nas kerd, bîya wayîrê îradeyî û bîya wayîrê nasnameyî. Sey mi bi mîlyonan cinîyê Kurdî estê. Ma nînan dendarê hemrayîya cinîyan a birêz Ocalanî yê. Înanê ke sere de çalakîya mi rê veng dayî hemrayê min ê cinîyî bî.
Ewro çîyo ke ma ser o yeno ferzkerdene tecrîd, şer, şidet û merg o. No sîstemêko zûreker o. Wazeno ke bi zûran xo pay ra verdo. Seba cuyêka bêtecrîde, bêşer, bêmerg û bêzûre xeylî bedelî ameyî dayene. Ma nika zî hadre yê ke bidê.
Ganî tecrîd wedarîyo, şer vindero. Birêz Ocalan çareyo tekane yê vindertişê şerî yo. Ê no îrade çende reyî ramot, ganî ma nê îradeyî rê wayîr vejîyê. Ma bi mucadeleyê hîna xurtî, bi organîzebîyayîş û xoverdayîşî eşkenê bi ser bikewê. Ma aşitîya xo ya birûmete û çareserîya demokratîke bi xo awan bikerê. Ez vana heta ke ma netîce nêgîrê ma nêvinderê, xo ver bidê…
