Li Girtîgeha Tîpa T ya Siwêrekê 4 girtî ji bo rakirina tecrîda girankirî ya li ser Rêberê Gelê Kurd Abdullah Ocalan ketin greva birçîbûnê ya bêdem û bêdorveger
Çalakiya greva birçîbûna ya ku ji bo rakirina tecrîda girankirî ya li ser Rêberê Gelê Kurd Abdullah Ocalan, bi pêşengiya hevseroka Kongreya Civaka Demokratîk (KCD) û parlamentera Partiya Demokratîk a Gelan (HDP) Leyla Guven ve di 7’ê mijdarê de hatiye destpêkirin, berbelav dibe. Li girtîgehên bakurê Kurdistanê û Tirkiyeyê bi dehan girtî tev li çalakiyê dibin û daxwaza rakirina tecrîdê dikin.
Li gorî agahiyên ji malbatên girtiyan, li Girtîgeha Tîpa T ya Siwêrekê jî ji 5’ê mehê ve ye 4 girtî ketine çalakiya greva birçîbûnê ya bêdem û bêdorveger. Li gorî agahiyan, navên girtiyên ku ketine greva birçîbûnê wiha ne: “Sûnay Yaman, Sozdar Çîçek, Serhat Yilmaz û girtiya jin a bi navê Dilşat ku paşnavê wê nehat zanîn.”
Çalakya greva bêdem û dorveger jî didome
Her wiha malbatan ragihand ku li girtîgehê çalakiya greva birçîbûnê ya bêdem û dorveger ku di 27’ê mijdarê de li 117 girtîgehan bi tevlêbûna herî kêm 600 girtiyan hatiye destpêkirin û 10 rojan carekê ji hêla komeke din ve tê dewrgirtin jî li girtîgehan didome. AMED
