Asayîşa Silêmanîyê dest danî ser 500 pirtûkên Rêberê Gelê Kurd Abdullah Ocalan, Sakîne Cansiz, Karl Marks û hinek pirtûkên din ên ji aliyê ciwanan ve dihatin firotin. Ciwanê pirtûkfiroş got ku qedexekirina pirtûkan ne çareserî ye
Di 7’ê çileyê de Asayîşa Silêmaniyê li ber Baxê Giştî yê Silêmaniyê 3 ciwanên ku pirtûk difirotin binçav kirin û dest danîn ser pirtûkên wan. Her wiha asayîşê 2 ciwanên ku li Zanîngeha Silêmaniyê dixwestin pirtûkan bifiroşin binçav kirin û dest danîn ser pirtûkan. Asayîşa Silêmaniyê 500 pirtûkên ku di dema binçavkirina ciwanan de desteser kirin nedane ciwanan û hîn di destê asayîşê de ne
Pirtûkfiroş Dara Mehyedîn têkildarî mijarê ji RojNewsê re axivî û wiha got: “Qedexekirina pirtûkan ziyanek mezin e lê ev nikare pêşiya fikran bigire. Yên ku tên pirtûkên Ocalan an jî nîşandana fîlmê Sakîne Cansiz qedexe dikin, di rastiyê de hevalbendên dijmin ên gelê kurd in. Em hemû dizanin bi taybet Îran û Tirkiye dijminê gelê kurd in û dixwazin kurdan ji holê rakin.”
Dara di dawiyê de got ku ger nehêlin ew pirtûkên Ocalan li ser şeqaman belav bikin, dê di pirtûkxaneyan de belav bikin, ger vê jî nehêlin dê bi awayên cuda pirtûkan bifiroşin. SILÊMANÎ
