Berdevka Komîsyona Hiqûq û Mafên Mirovan a HDP’ê Ayşe Acar Başaran têkildarî rewşa Leyla Guven daxuyaniyeke nivîskî weşand û diyar kir ku rewşa Guven di xetereyê de ye
Berdevka Komîsyona Hiqûq û Mafên Mirovan û endama Desteya Rêveber a Navendî ya HDP û parlementera Êlihê Ayşe Acar Başaran, têkildarî rewşa hevseroka KCD û parlementera HDP’ê ya Colemêrgê Leyla Guven a 64 roj in di greva birçîna bêdem û bêdorveger de ye, daxuyaniyeke nivîskî weşand.
Başaran diyar kir ku rewşa Guven ku ji 8’ê mijdarê ve di greva birçîbûnê ya bêdem û bêdorveger de ye, krîtîk e û wiha got: “Guven ji ber rewşa xwe ya giran di hefteyên dawîn de nikare derkeve hevdîtina parêzerên xwe. Nebza Guven di navbera 55-60 lê dide û tansiyona wî jî di navbera 5-7 e.”
Di berdewamê de destnîşan kir ku Guven êdî nikare avê jî vexwe û wiha domand: “Leyla Guven nêzî 15 kîloyan li xwe kêm kiriye û bi tena serê xwe nikare pêdiviyên xwe bi cih bîne. Tena serê xwe nikare bimeşe, li hemberî deng û ronahiyê hesasiyeta wê çêbûye. Di heman demê de ji bo rakirina tecrîda li Îmraliyê di 27’ê mijdarê de li girtîgehan grevên birçîbûnê hatibûn destpêkirin û çalakî belav dibe. Heta îro herî kêm 171 girtiyan dest bi greva birçîbûnê ya bêdem û bêdorveger kirine. Desthilatdariya heyî hay ji rewşa Guven û ya ji girtîgehan heye lê heta niha tu gav neavêtine. Heke rewşeke neyînî pêk were berpirsyar hikûmeta AKP’ê ye.”
Her wiha Başaran bang li raya giştî, saziyên navneteweyî, saziyên hiqûq û mafên mirovan û saziyên civakî kir ku bila têkevin nav hewldanan û nerazîbûna xwe ya demokratîk nîşan bidin.” ENQERE
