Lîstika Şanoyê ‘Tenê Ez’ ya ku ji filmê Charlie Chaplîn “Dîktatorê Mezin” ê pêkenok hatiye guncandin li Amedê derket pêşberî şanohezan
Filmê Charlie Chaplîn “Dîktatorê Mezin” ê pêkenok ku sala 1940’î hatibû çêkirin, ji aliyê Teatra Jiyana Nû ve bi navê Lîstîka Şanoyê ‘Tenê Ez’ hatiye guncandin û duh saetên êvarê li Şanoya Bajêr a Amedê derket pêşberî şanohezan. Lîstika ku bi qasî saet û 20 deqeyan domiya rastî eleqeyeke mezin a şanohezan hat.
Di lîstîkê de bi awayekî pêkenok faşîzma ku îro li Tirkiyeyê ji aliyê serokkomarê tirk Recep Tayyîp Erdogan ve hatiye avakirin, tê rexnekirin. Di dawiya lîstikê de lîstikvanan temaşevan silav kirin û çalakiya greva birçîbûnê ya parlamenter û hevseroka KCD’ê Leyla Guven bi bîr xist. Her wiha lîstikvanan ji temaşevanan xwest ku li berxwedana Guven xwedî derkevin.
Her wiha dê lîstik îro saet di 19.00’an de li Şanoya Bajêr a Amedê careke din bê lîstin.
