Grevê vêşanîye yê Strasbourgî kewt roja xo ya 26ine, hetêk ra zîyaretkarê çalakwanan yenî hetêk ra zî hadreyîya çalakîya Parîsî yena kerdene.
Strasbourg de çalakîya grevê vêşanîye yê bêdem-bêagêrayîşî ke semedê wedartişê tecrîdê serê Rayberê Şarê Kurdî Abdullah Ocalanî yena kerdene roja xo ya 26ine de bi qerardarîya pîle dewam kena.
Dr. Fahrettîn Gulşeno ke weşîya çalakwanan taqîp keno vatbi ke tayî çalakwanan de zaf vîndîkerdişê kîloyî esto û hemverê veng û roşinî de zêde hesasbîyayîş virazîyayê. No zî ramojneno ke weşîya çalakwanan xirab bena. Ewro semedê paştîdayîşî bajarê Dortmund û Essenî yê Almanya û bajarê Lyonî yê Fransa ra zîyaretkarî çalakwanan esbî. Çalakî rojane Stêrk TV û Medya Haber ra yena taqîpkerdene. Çalakwanan ra tayî sey temsîlkarê çalakîya grevê vêşanîye do siba tewrê çalakîya Parîsî bibî.
Çalakwanê grevê vêşanîye yê ke do 12ê Çile de tewrê çalakîya Parîsî bibê vat ke “Bi qirkerdişê Parîsî wazenê îradeyê şarê Kurdî îmtîhan bikerê. La ê do bi ser nêkewê çunke mîrazê nê têgêrayîşî de cinîyê Kurdî yê ke pêrodayîşê Sarayan hîna kenê pîl estê.” STRASBOURG
