Budçeya 2018î ya Şaredarîya Çewligî se ra 45 kêmasî tede esta. Endamê Meclîsê Şaredarîye Aydin Burçunî dîyar kerd ke kombîyayîşê îstisnayî yê 26ê Kanûna 2018î de butçe ra kredîyo 57 mîlyonî ame vetiş û pê makyaj ame kerdiş
Budçeya 2018î ya Şaredarîya Çewligî 120 mîlyon lîre ame dîyarkerdiş, labelê vejîya raşte ke butçe de se ra 45 yanî 57 mîlyon lîre kêmanî esto. hedîse badê ke Bankaya Îllerî waştişê kredî ya seba projeyê bedilnayîşê bajêr ya taxa Kulturî red kerde vejîya raşte. Derheqê babete de Endamê Meclîsê Şaredarîya Çewligê yê Koma Partîya Herêmê Demokratîkî (DBP) Aydin Burçunî qisey kerd.
Burçunî qiseykerdişê xo de da zanayene ke çewlig teba ameyo veradayîş û wina dewam kerd: “Şaredarîya bîyaye seba bedilnayîşê bajar yê taxa Kulturî Bankaya Îllerî ra 57 mîlyon kredî waşte. Labelê banka talebê şaredarî red kerde. Badê hedîse vejîya raşte ke butçeya 2018 yê şaredarî de se ra 45 kêmanî esto. Dima ra bi hawayo lez 26ê Kanûna 2018î de kombîyayîşêko îstisnayî ame viraştiş û kredî butçera ame vetiş û makyaj ame kerdiş. Baş zanê ke bi no hawa tena roja xo vîyarnenî. Na rewşe do ma heminan rê bêra barkerdiş. Seba bedilnayîşê bajar û seba projeyo ke raşte de çin o dîyarî daxî dîyabî. Êdî kes no qebul nêkeno. Bi no hawa Çewlig bêwayîr ame veradayîş.”
Burçunî qiseykerdişê xo yê peyênan de zî wina va: “ Namzedê AKPyî yê Şaredarîya Çewligî Erdal Arikan tewrê kombîyayîşanê fermîyan beno. Hema 3 aşmê şaredarîya bîyaye esta, la namzedê AKPyî nika ra tewrê kombîyayîşanê fermîyan beno. Şaredaro bîyaye vano; xora ez nêbena namzed û serê twîtterî de parekerdişê sey ‘dîyarîyê ma yê hemverê vewre bêmaben dewam keno’ pare keno. Prosesê verênan de zî wina ame kerdiş. Labelê şar do hemverê no tîyatro de goş bido vengê aqilê xo.” AMED
