Waya Mazlum Doganî ya 70 serrî Serap Mutluye ke flamaya keske, sûre û zerde beste tabutê dayîka xo ameye tepiştiş. Avûkat Eren Keskîne qerarê tepiştişê Mutluye sey ‘trejîkomîk’ û ‘huqûqê dişmenî’ biname kerde û dîyar kerde ke ê îtirazê qerarî kerdî
Dozgerîya Komarî ya Mazgêrdî de derheqê waya Serkêşê PKKyî Mazlum Doganî, Serap Mutluye de tehqîqat daye dest pêkerdiş û çarçeweya tehqîqatî de Mutluye bajarê Stenbolî de ameye tepiştene. Mehkemaya Ceza Sulhî ya Mazgêrdî ra bi îdîaya ‘propaganda rêxistinê kerda’ derheqê Mutluye de qerarê tewqîfkerdişî daye. Ame zanayene ke Mutluye seba ke 11ê teşrîna peyêne 2018î de wextê merasîmê definkerdişî de flamaya keske, sûre û zerde beste tabutê dayîka xo ameye tepiştiş.
Mudirîya Polîsan ya Depî seba îfadedayîşî 12ê teşrîna peyêne 2018î de vendaye Mutluya 70 serrî. Avûkatê Mutluye, Eren Keskîn û Jiyan Kayaye hemverê qerarê tepiştişî de îtirazê Mehkemaya Ceza Sulhî ya Mazgêrdî kerdî û waştî de muwekîla înan bi lez serbest bêra veradayîş. Derheqê babete de avûkatan ra Eren Keskîne qisey kerde.
Flamayêka rengin bena sebebê sucî
Keskîne qiseykerdişê xo de wina va: “Rojek badê merasînê cenaze Mudirîya Karakoçanî îfadeya Mutluye girewte. Aye wext çîyo ke suc bêro nîşandayîş nêvînayî û wina kerdî. Sucdarîyêko trajîkomîk o. Tirkîye hem huqûqê xo yê mîyanên, hem qerarê mehkemaya berzî û hem zî xala 10. yê Pêkerdişê Heqê Merdiman ya Ewropa binpay kena. Tewqîfkerdiş û tepiştiş teberê aqilî yo. Senî flamayêka rengin bena sebebê sucî. Sucdarî tena flama yo.”
Seba ke waya Mazlum Doganî ya
Keskîne tewr peynî sebebê esasî yê tepiştişê Mutluye kerde û wina qedênaye: “Xora muwekkîla ma îfade dabî. Şikê remayîşî zî çin o. Emrê aye 70 serr o. Dayîkêka extîyar ke hema travmaya dayîka xo derbaz nêkerda ameye tewqîfkerdiş. Hetê huqûqî yê qerarî çin o. Huqûq dişmeyîyê aye kerdo. Binê ci de sewbîna ti sebebêk cîya çin o. Sewbîna sebebêk zî oyo ke seba ke waya Mazlum Doganî ya û bîya namzeda şaredarî ya Depî ameya tepiştiş. Îhtîmalêk gird do Mutluye weçînayîş de qezenc bikerdêne. La wina texmîn nêkerdêne ke bi mehneyêka huye bêra tewqîfkerdiş. Muwekîla ma nika Zindanê Cinîyan yê Bakirkoyî yê Stenbolî de ya.” STENBOL
