Hevseroka KCD’ê û parlamenter Leyla Guven ji bo tecrîda li ser Rêberê Gelê Kurd Abdullah Ocalan bê rakirin 71 roj in di greva birçîbûnê ya bêdem û bêdorveger de ye
Çalakiyên greva birçîbûnê yên li dijî tecrîdkirina Rêberê Gelê Kurd Abdullah Ocalan ku di pêşengiya Hevseroka Kongreya Civaka Demokratîk (KCD) Leyla Guven de dest pê kiriye her ku diçe li girtîgehan belav dibe.
Çalakiya greva birçîbûnê ya Leyla Guven ku di 8’ê mijdarê de dest pê kiribû, di roja 71’emîn de berdewam dike. Rewşa tenduristiya Guven ketiye asta krîtik. Lê Guven bi biryar çalakiya xwe berdewam dike.
Çalakiya Endamê Meclîsa HDP’ê Nasir Yagiz ya li Hewlerê bi heman armanc û daxwazê dest pê kiriye jî di roja 58’an de berdewam dike.
Çalakiya grevê ya li Strasbaûrgê jî di roja 32’ê û çalakiya koma ewil ku di 16’ê kanûnê de li girtîgehan dest pê kir di roja 33’emîn de berdewam dike.
Niha nêzî 230 girtî li zêdeyî 40 girtîgehan çalakiyên greva birçîbûnê ya bêdem û bêdorveger berdewam dikin. AMED
