Di encama topbarana artêşa tirk û çeteyên wê de li ser gundê Soxankê yê navçeya Şêrawa ya kantona Efrînê de jinek û hevserê wê birîndar bûn. Her wiha çavkaniyên herêmî diyar kirin ku sivîl bûne hedefa topbaranê û gelek malan xesar dîtine
Artêşa tirk û çeteyên wê ku li gundê Kîmar ê navçeya Şêrawa bi cih bûne, bi tank û topên hewanê gundê Soxankê topbaran kir. Di encama topbaranê de jinek û hevserê wê ku ji gundê Soxankê ne, birîndar bûn. Jina 58 salî ya bi navê Nedîma ji serê xwe birîndar bû û hevjserê wê Elî Mamo yê 63 salî jî ji lingê xwe birîndar bûye.
Her du ji bo tedawiyê rakirin Nexweşxaneya Avrîn a kantona Şehbayê. Her wiha di encama topbarê de xesarên madî di mal û erebeyên sivîlan de çêbûn.
Birarê Elî Mamo ku bû şahidê topbaranê, wiha got: “Îro ji nişka ve artêşa tirk a dagirker û çeteyên wê yên terorîst em topbaran kirin. Malên sivîlan bi awayekî yekser kirin hedef. Di encama wê de xesarên madî di malan de çêbûn. Mala birayê min bi ser wan de rûxiya û birayê min û hevsera wî birîndar bûn.”
Bijîşkên Nexweşxaneya Avrîn diyar kirin ku rewşa birîndaran xeter e û dê wan di nexweşxaneyê de derman bikin. EFRÎN
