Li bajarên Şîno û Sine yên rojhilatê Kurdistanê 5 kurd ji aliyê îstîxbarata rejîma Îranê ve hatin binçavkirin
Li gorî malpera Tora Mafên Mirovan a Kurdistanê (KHRN), roja çarşemê (16’ê çileyê), bi dehan endamên Îtilia’ata Îranê bi dorpêçkirina gundê dîrokî yê Nigil ê li parêzgeha Sine ya rojhilatê Kurdistanê, êrîş birin ser mala du çalakgerên sivîl ên bi navê Awat Kerîmî û serokê Meclîsa Gund Idrîs Mihemedî. Kerîmî û Mihemedî hatin binçavkirin û birin cihekî nediyar.
Her du çalakgerên navborî salên derbasbûyî beşdarî kampaniyayên temirandina agir û komkirina zibaleyên hawirdora gundê xwe bibûn. Her wiha roja pêncşemê (17’ê çileyê), sîxurên îstixbarata Îranê li bajarê Şîno, du hemwelatiyên kurd ên bi navê Osman Hesenî û Hesen Mûsewî binçav kirin. Di heman rojê de welatiyekî din ê kurd ji gundê Caşîran ê Şinoyê ji aliyê hêzên rejîma Îranê ve hate girtin.
Hêjayê gotinê ye, di sê mehên borî de pêvajoyeke nû ya vexwendin û binçavkirina welatiyên kurd li rojhilatê Kurdistanê dest pê kiriye. Li gorî hejmarên KHRN’ê, di van sê mehan de zêdeyî 100 welatiyên kurd ji hêla Îtilia’ata Sipah û Îdareya Îtilia’atê li bajarên cuda hatine girtin. SINE
