Nûnerê taybet ê berê yê Amerîkayê yê li nav Koalîsyona Navneteweyî ya li dijî DAIŞ’ê Brett McGurk diyar kir ku planeke Washîngtonê ya piştî vekişînê li ser Sûriyeyê tune ye û got ku Tirkiye nikare bibe alternatîf
Nûnerê taybet ê berê yê Amerîkayê yê li nav Koalîsyona Navneteweyî ya li dijî DAIŞ’ê Brett McGurk ku piştî biryara serokê Amerikayê Donald Trump a ji bo vekişîna ji Sûriyeyê îstifa kir, ji qenala CBS’ê re axivî. McGurk biryara vekişînê nirxand û diyar kir ku ji ber planeke Amerîkayê ya ji bo piştî vekişînê nîne rîskên li ser leşkerên amerîkî yên li herêmê zêde bûne.
McGurk da zanîn ku Trump vekirî axiviye û wiha got: “Ev yek jî tê wê wateyê ku peywireke vekirî ya yekîneyên me heye: vekişîn, vekişîna bi rengekî ewle. Ev yek dê dorê li Dewleta Îslamê fireh bike.” McGurk destnîşan kir ku Tirkiye ne hevalbendekî wisa ye ku karibe şûna Washîngtonê dagire û got ku ev yek realîst nîne.
McGurk di berdewamê de jî ragihand ku zehmet e ji aliyekî ve tu xwe vekişînî û ji aliyekî din ve jî hewl bidî bi koalîsyoneke din şûna xwe dagirî û ev tişt got: “Ev plan ne ya bicihanînê ye.” McGurk di 18’ê çileyê de jî daxuyaniyek dabû rojnameya Washîngton Postê û gotibû ku Tirkiye ne xwedî derfetên leşkerî ye ku karibe bi tena serê xwe bi roleke jê tê xwestin rabe. WASHÎNGTON
