Denîz Kayayo ke bi nameyê xoverdayoxanê zîndanî yê PKK û PAJKî eşkerayîye da va: “Heta wedartişê tecrîdê serê Rayberîya ma, do xoverdayîşê ma bi qerardarîya girde dewam bikero.”
Bi nameyê tepişteyanê Partîya Karkeranê Kurdistanî (PKK) û Koordînasyonê Partîya Azadîya Cinîyanê Kurdistanî (PAJK) Denîz Kayayî eşkerayîyêk da û derheqê xoverdayîşê grevê vêşanîye de nê bare kerdî: “Hamleya xoverdayîşî ke vera tecrîdê serê Rayberîya ma zîndanan de ameye destpêkerdene bi qerardarîya girde dewam kena. Hûkmatê MHP-AKPyî yo faşîst bi polîtîkaya taybetî ya şerî wazeno ke xoverdayîşê ma tasfîye bikero. La wa ê hole bizane ke heta wedartişê tecrîdî do xoverdayîşê ma dewam bikero. Hemsereka KCDyî û parlamentera Colemêrgî Leyla Guvena ke 80 rojî yo grevê vêşanîye yê bêdem-bêagêrayî de ya, teber de zî çalakîya xo rê dewam kena. No çîyêk o zaf muhîm o. Ma sey tepişteyê PKK û PAJKî teber de bî zî zere de bî zî heta wedartişê tecrîdî, ma do xoverdayîşê xo bi moralêko xurt û qerardarîya girde bidomnê. Ma veng danê şarê xo û hetanê demokratan wa veng bidê nê vengî û xoverdayîş gird bikerê. Ma teber de bî zî, zere de bî zî tecrîd do bêro şikiten!”
