Xoverdayîşê Hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî grevê vêşanîye yê bêdem û anêgêrayîşî de ya, kewt roja 81. Guvene badê ke ameye tehlîyekerdiş zî 3 rojî yo ke keyeyê xo de çalakîya xo dewam kena.
Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene 8ê Teşrîna Peyêne de Zindanê Cinîyan yê Amedî de seba wedarnayîşê tecrîdê serê Rayberê PKKyî Abdullah Ocalanî kewte grevê vêşanîye yê bêdem û anêgêrayîşî. Badê çalakîya Guvene xoverdayîş vilayê heme zindanan bî û xeylê hepsîyî nika grevê vêşanîye yê bêdem û anêgêrayîşî de yî. Çalakîya Guvene ewro kewte roja 81.
Çalakîya Endamê Meclîsê HDPyî Nasir Yagizî ke Hewler de seba eynî waştişan dest bi grev kerdbî zî roja 68. de dewam kena. Çalakîya grevê Strasbaurgî zî roja 42. û çalakiya koma ewil ke 16ê Kanûne de zindanan de dest pêkerdbî roja 43. de dewam kena. AMED
