Hêzên Rizgariya Efrînê bi daxuyaniyekê ragihand ku hêzên wan li navenda Efrînê û Marê li dijî hêzên artêşa tirk û çeteyên wê çalakiyên bi bandor pêk anîne. Di daxuyaniyê de hat gotin ku herî kêm 3 leşkerên artêşa tirk hatine kuştin
Çalakiyên şervanên Hêzên Rizgariya Efrînê yên li kantona Efrînê û Herêma Şehbayê yên li dijî hêzên artêşa tirk û komên çete yên girêdayî wan berdewam in. Hêzên Rizgariya Efrînê têkildarî çalakiyên dawî daxuyaniyeke nivîskî weşand. Di daxuyaniyê de hat destnîşankirin ku hêzên wan li Efrîn û Marê derbên bibandor li hêzên dagirker dane.
Hêzên Rizgariya Efrînê di daxuyaniyê de diyar kir ku hêzên wan di 25’ê çileyê de li navenda Efrînê li dijî wesayîta ku 5 leşkerên tirk û çeteyên wan ên koma Sûltan Mûrad tê de bûn, çalakiyeke sabotajê pêk anîne. Hat gotin ku di encama çalekiyê de kuştî û birîndar çêbûn lê agahiyên zelal nehatin bidestxistin.
Di berdewamiyê de Hêzên Rizgariya Efrînê daxuyand ku hêzên wan di 26’ê çileyê de li dijî leşkerên tirk ên li taxa Mehmûdiye ya Efrînê çalakiyeke sabotajê pêk anînê û di encamê de 3 leşker hatine kuştin û leşkerek jî birîndar bûye.
Li Marê çalakiyên bi bandor
Daxuyanî wiha bi dawî bû: “Di 26’ê çileyê de şervanên me li gundê Tuwês ê bajarokê Marê li dijî wesayîta koma çete ya Cebhe El Şamiyeyê bi çekên giran çalakiyek pêk anî. Di vê çalakiyê de wesayît hate rûxandin lê hejmara kuştî û birîndarên çeteyan nehat zanîn. Di heman rojê de komeke me li bajarokê Marê li dijî kozikeke çeteyan çalakî pêk anî. Li ser vê yekê şer derket û çeteyê bi navê Diyab Seîd hate kuştin û çeteyên bi navên Îbrahîm Mihemed Îdrîs, Diya Memûn Neharî, Semir Îbrahîm û Diya Mihemed jî birîndar bûn.” EFRÎN
