MHP’ê ji bo hilbijartinên herêmî strana Koma Berxwedan a bi navê ‘Kurdistan’ dizî û wekî muzîka hilbijartinê bi kar anî. Koma Berxwedan bi daxuyaniyê nerazîbûn nîşanî diziya MHP’ê da
Koma Berxwedan têkildarî muzîka hilbijartinê ya MHP’ê daxuyaniyeke nivîskî da. Koma Berxwedan diyar kir ku di her dema hilbijartinê de tifaqa faşîst a AKP-MHP’ê ji bo dengê gelê kurd û muxalefetê desteser bike serî li her şêwe zext û hîleyan dide û hewl dide desthilatdariya xwe bidomîne.
Di daxuyaniyê de hate ragihandin, şirîkê tifaqa faşîst MHP’ê a nijadperest, bi bûyereke nû ya diziyê careke din ketiyê rojevê û wiha hat gotin: “MHP’a faşîst û nijadperest, strana ‘Bihuşta Cîhanê Kurdistan’ a albûma ‘Amed’ a koma me diziye ku gotin û muzîka vê stranê ya hevalê me Seyîdxan e û di sala 1991’an de derket. Berhema ‘Bihuşta Cîhanê Kurdistan’ dizî û ji aliyê stranbêjekî ku rûreşiya hurmendan e weke strana hilbijartinê ya MHP’ê tê bikaranîn. Gelê me û dostên me yên muzîkhez ev dizîtî zevt kirine.”
Koma Berxwedan diziyên demên berê bi bîr xist û wiha got: “Ev kesê ku karê wî dizî ye, ji aliyê gelê me û raya giştî ve tê zanîn. Strana ‘Olurum Turkiyem’ jî ku MHP’a nijadperest di hilbijartinên beriya niha de bi kar dianî, strana ‘Dayê dayê’ ya muzîsyenekî ji Cizîra Botan e ku sala 1987’an hatiye gotin.” AMED
