Leyla Guvene va: “Rayîrê ma çiqas bizahmet beno wa bibo, ma do ser bikewê. Bi veradayîşê mi waşt ke xoverrodayîş bêro parçekerdene. Ma do her tim anorkî biciwîyê.”
Grevê vêşanîye yê hemsereka KCDyî û parlamentera HDPyî Leyla Guvene semedê wedartişê tecrîdê serê Rayberê Şarê Kurdî Abdullah Ocalanî ameyo destpêkerdene roja 85. de yo. Parlamenteranê HDPyî verê bînaya KCDyî de dest bi çalakîya nobete kerde. Leyla Guvene bi telekonferansî çalakwanan de qisey kerd.
Guvene va: “Mîyanê faşîzmî de şima vanê qral rût o’ û têkoşînê xo domnenê. Têkoşîn û karê şima zereyê şarî ra yeno û reyna şino reseno şarî. Nêzana, serê weçînitişî ra çiqas wext derbaz bi, la şima hemeyan rê serkewtiş wazena. No rayîr çiqas bizehmet beno wa bibo ma do ser bikewê.”
Leyla Guvene peynî de va: “Nobeta şima ya ucayî zaf hêja ya. Ma bi serran cehd kerd ke bêrîme têhet de û pîya cayêk de vindîme. Ma nika pîya yîme. Birêz Ocalan nê helwestî zaf hêja vîneno. HDP û fîkrîyatê HDPyî dîyarîya tewr hêca ya ke şarê ma rê ameya kerdene. Tirkîyeya tam demokratîke û Kurdistano azad mimkin o. Bîye gama destpêke, nêzdîyê 300 hevalê ma hepisxaneyan de bi grevê vêşanîye na daye destpêkerdene.”
Parlamentera HDPyî ya Edeneyî Tulay Hatîmogûllarî vat, “Çîqêk zî beno sebebê şîkîyayîşî zaf çîyan. Xoverrodayîş to seba ma zaf hêja yo. Xoverrodayîş û waştişê to zaf biheq ê. Ma wazenê ti naye bizane ke, ma bi hezaran wayî vera zext û zordarîya faşîzmî de her bedelî gênîme çimanê xo ver û xorrodayîşê to vila kenîme. Ma xoverrodayîşê to silam kenîme. Ma to ra zaf hes kenîme.” AMED
