Yewîya Hêzî ya Şoreşgêrî ya Dêrsimî bi yew kombîyayîşî namzedê hemşaredarîye kerdî eşkera. Kombîyayîş bi coşêko pîl dest pêkerd.
Dêrsim de xeylî rêxistin û hetî ameyî têhet û seba weçînitişî yewîye viraşte. Yewîya Hêzî ya Şorêşgêrî ya Dêrsimî Salona Veyveyî ya Dêrsimî de bi yew program namzetê hemserekîye yê şaredarîye îlan kerdî. Hemserekê Pêroyî yê HDPyî Sezaî Temellî, Sereka Pêroyî ya EMEPî Selma Gurkane, Hetkarê Serekê TÎPî Bariş Atay,Temsîlkarê Partîzanî, Hetkara Hemserekîya HDP Halîde Turkogluye, parlamenterê HDP‘yî, endamê PMyî yê DBP û HDPyî, seba ke beşdarê kombîyayîşî bibê ameyî merkezê bajarî.
Temsîkarê partîyanê sîyasîyan, hetê şarî ra bi coş, Petrolê Kalanî yê Aktulukî de ameyî qebulkerdene. Temsîlkarê partîyanê sîyasîyan û şarê Dêrsimî, verê banê HDP‘yî de ameyî pêser û bi rayîrşîyayîş şîyî Salona Veyveyî ya Dêrsimî. Polîsan sereyê temsîlkaranê partîyanê sîyasîyan û beşdaranê bînan sehna û aye ra dima girewtî salone.
Salone bi posteranê Fîgen Yuksekdage, Selahattîn Demîrtaş û hemşaredaran ê Dêrsimî ê ke girewteyê, ameyebî xemelnayene pankartê sey “Ma xo zî, bajarê xo zî bixo îdare kenîme“,“îradeya ma rê qayûm nêno tayînkerdene“ û “îtîfaq bi yewbîyayîye do ser bikewo“ bi ziwanê Kurdkî û Tirkî ameyî daliqnayene.
Programî bi coşêko pîl dest pêkerd. Hemşaredarê Dêrsimî Nurhayat Altune û Mehmet Alî Bul bi Qerarnameyê Hukmê Qanûnî (KHK) ameyîbî girewtene û cayê înan de qayûm amebi tayînkerdene. Hemşaredarî Nurhayat Altune û Mehmet Alî Bulî û hemşaredara verêne Edîbe Şahîne hepisxane ra peyamî erşawitî û program bi wendişê peyamanê înan dest pêkerd.
Program bi qiseykerdişê temsîlkaranê partîyan ê sîyasîyan dewam keno. DÊRSIM
