HDP’ê li Heskîfê îtirazî jêbirina 204 qeyda hilbijêran kir lê Lijneya Hilbijartinê ya Heskîfê red kir
Li Heskîfê qeyda 204 hilbijêran hat jê birin. Li gel vê yekê qeyda 122 hilbijêrên xeyalî li Heskîfê derketibû holê. HDP’ê li dijî vê rewşê îtirazî Lijneya Hilbijartinê ya Heskîfê kir. YSK’ê îtiraza HDP’ê red kir. HDP’ê li ser vê redkirinê serî li Lijneya Hilbijartinê ya Bajêr a Êlihê da.
Hevserokê Rêxistina HDP’ê ya Heskîfê Salîh Çakar têkildarî mijarê axivî û got ku dê bibin şopdarê vê nelirêtiyê. Çakar bi bîr xist di hilbijartina herêmî ya 2014’an de DBP’ê 538 deng û AKP’ê jî 546 deng girtine û wiha got: “Me di hilbijartina bihûrî de bi 8 dengan ferq şaredariyê winda kir. AKP îro fêm kir ku dê şaredariyê winda bike, demildest qeyda 204 hilbijêran jê bir. Ewilî 122 hilbijêran li Heskîfê bi awayekî nelirê qeyd dikin. Hejmara van qeydan hemû rastiya AKP’ê radixe ber çavan. Lê tevî hemû hîle û nelirêtiyan wan jî teqez em ê bi ser bikevin.” ÊLIH
