Leyla Guvena ke 89 rojî yo grevê vêşanîye de ya, problemê ci yê giran ê weşîye dest pêkerde. Dejê ci zafêr bîyî nêeşkena werzi lingan ser û awe zî bişeme. Karmendanê weşîye îqaz kerd ke “Rewşêka nêna waştene beno ke bêro qewimîyayene.
Hemsereka Kongreya Komela Demokratîke (KCD) û Parlamentera Partîya Demokratîke ya Şaran (HDP) ya Colemêrgî Leyla Guvena ke 89 rojî yo vera tecrîdkerdişê Rayberê Şarê Kurdî Abdullah Ocalanî grevê vêşanîye de ya rewaşa weşîya ci çend şino xirabêr beno. Ame vatene ke, tansîyonê Guvene zaf kewto, bêhal bîya, problemê sey hewnî, zor şimitişê awe, krampê madeyî estî û hemverê boye û roşinî de zêde hesasbîyayîş virazîyayê. Guvenê bê hetkarî rayîr ra şina.
Beno ke rewşêka xirabe bêro qewimîyayene
Kedkaranê weşîye balê ante rewaş Guvene ser û va: “Wextê destpêkerdişî yê grevê vêşanîye de seba kêmbîyayîşê karbonhîdratan û helîyayîşê donê leşa merdiman, merdim kîlo vîndî keno. Bi dewamkerdişê grevê vêşanîye proteînê ke masûlkeyan de kêm benê. Seba ke grevê vêşanîye yê Leyla Guvene kewto roja 89îne dejê masûlkeyan reyde proteînê masûlkeyan helîyeno û benê kêmî. No zî nîşan dano ke, rewşa eye ya weşîye her ke şona xaftela vurîyena û beno ke rewşêka xirabe bêro qewimîyayene.” AMED
