Asayîşa PDK’ê çalakiya greva birçîbûnê ya endamên Meclisa Îştar a li ber avahiya NY ya Hewlêrê kir hincet û hefteyek e ambargoya ketin û derketinê daniye ser wargeha Mexmûrê
Asayîşa PDK’ê ya Hewlêrê bi hinceta ku endamên Meclisa Îştar li dijî tecrîda li ser Rêberê Gelê Kurd Abdullah Ocalan çalakî li ber avahiya Neteweyên Yekbûyî (NY) dane destpêkirin, hefteyek e ambargoya derketinê daniye ser wargeha Mexmûrê û destûrê nade karker, nexweş û bi giştî jî gel biçin Hewlêrê.
Endamê Rêveberiya Karên Derve ya Mexmûrê Bêwar Unver têkildarî mijarê axivî. Unver diyar kir ku PDK çalakiya jinan a li dijî tecrîdê dike hincet lê di rastiyê de ev nêzîkatiyeke siyasî ye û ger ev helwesta PDK’ê dom bike dê weke gelê wargehê çalakiyên cur bi cur li dar bixin.
Unver anî ziman ku PDK tehemûlê çalakiyên demokratîk nake û bal kişand astengiyên ku hêzên asayîşa PDK’ê ji şêniyên wargehê re derdixîni û wiha got: “Bi awayekî ne hiqûqî û hincetên vala ev nêzî hefteyekê ye asayîşa PDK’ê rê li nexweş, karker û gelê Mexmûrê digire ku derbasî Hewlêrê nebin. Bi taybetî di van 3-4 rojên dawî de hewl didin nêzîkatiyên provakatîf derbixin û gel li hemberî saziyên wargehê sor bikin. Gotinên; ‘Rêveberiyê we wisa dikin, dîsa hûn bi xwe bûne sedem ku em rê bigirin’ di nav welatiyê diçin bendên derbasbûnê de dikin. Dîsa rê didin hinekan rê nadin hinekan ve jî dike ku dubendî nav gel de pêk bîne. Divê gelê me vê yekê bizane asta çalakiyê gihişte asteke ku beden li ber mirinê ne. Ji bo vê çi dibe bila bibe wê çalakiyê me tevî hemû astengî û rêgiriyan bidome. Divê hêzên rêgir û astengkar jî baş bizanin ev hincet in, hemû kiryar siyasî ne. Her wiha helwesta gelê Mexmûrê ya li dijî van nêzikatiyan zelal e û van nêzîkatiyan qebûl nakin. Ger rêgirî, astengî û zextên PDK’ê dewam bikin dê gel li dijî vê bibin xwedî helwest û çalakiyan bikin.” MEXMÛR
