Xoverdayîşê Hemsereka KCDyî Leyla Guvena ke grevê vêşanîye yê bêdem û anêgêrayîşî de ya û seba wedarnayîşê tecrîdê serê Rayberê PKKyî Abdullah Ocalanî dest pêkerdbî roja 91. de yo. Guvene badê ke 25ê Çele de serbest ameye veradayîş keyeyê xo de çalakîya xo dewam kena.
Çalakîya grevê vêşanîye ke hemverê tecrîdkerdişê Rayberê PKKyî Abdullah Ocalanî de bi serkêşîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke dest pêkerdbî, roja 91. de dewam kena. Guvene seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene, 8ê Teşrîna Peyêne de Zindanê Amedî de dest bi grevê vêşanîye kerdbî û dima ra çalakîya aye vilayê zindanan, Tirkîye, Hewlêr, Fransa, Mexmûr, Şengalî û xeylê cayan bîye. Ewro 3 aşmî yo ke Guvene grevê vêşanîye de ya.
Leyla Guvene êdî problemanê weşî cuyena û hetê şimitişî de zî zehmetî ancena. Tansîyonê berzî vera wexto ke wirzena payan ser zehmetî ancena. Embazê HDP, DBP, TJA û hemwelatîyî şonê keyeyê Guvene û piştî danî aye. Her çiqas ke polîsî hêriş bikerî zî çalakîya piştîdayîşê Guvene her roje dewam keno. Xeylê bajar û qezayanê cîya cîyayan ra zî seba piştîdayîşî yenî zîyaretê Guvene. Wexto ke beno şewe hemwelatîyî şonê verê keyeyê Guvene û piştî danî çalakîya aye. Seba piştîdayîşê Guvene çar hetê dinya ra mesaj yenî.
Çalakîya Endamê Meclîsê HDPyî Nasir Yagizî ke Hewler bi eynî taleban dest pêkerdbî zî roja 77. de dewam kena. Çalakîya grevê vêşanîye ya Strasbaurgî û ya Îmam Şîş yê Gallerî zî roja 51. de yî. Çalakîya koma ewil ke 16ê Kanûne de zindanan de dest pêkerdbî zî roja 52. de dewam kena. Nika pêropîya zindanan de 281 ra zêde hepsîyê sîyasî grevê vêşanîye yê bêdem û anêgêrayîşî de yî. AMED
