Do Baroya Amedî 3 kerdoxê muhtemel yê cînayetê Tahir Elçî aşkera bikera.
Seke yeno zanayene 28ê Teşrîna Peyêne 2015î de Serekê Baroya Amedî Tahir Elçî wexto ke verê Mînareyê Çar Ling de îzehet dayêne ameybî qetilkerdiş. Seba ‘Kerdoxê muhtemel’ yê cînayetî aşkera bibî, Beşê Mîmarîya Edlî yê Forensic Architecture yê Unîversîteya Londra rê vîdeoyê ke wextê qewimîyayîşê hedîse de ameyî antiş ser de cigêrayîşan kerde û Baroya Amedî zî 14ê Kanûna 2018î de eynî vîdeoyan teslîmê Serdozgerîya Komarî ya Amedî kerde. Badê ke baro vîdeoyan teslîmê serdozgerîye kerde, aşkera kerde ke eke serdozgerîye seba îfadedayîşî nêvendo ‘kerdoxê muhtemel’ do ê delîlê verê dest bi raya pêroyî reyde aşkera bikerî.
Serdozgerîye heta nika ti çîyêk nêkerda. Cok ra Baroya Amedî malumat û belgeyê ke destê înan de yî do siba 8ê Sibate de raya pêroyî reyde aşkera bikera. Aşkerakerdişê raporî ra ver, goreyê malumatê verê dest, raporê Unîversîteya Londra 3 kerdoxê muhtemel estî. Goreyê raporî qetilkerdişê Tahir Elçî de 3 polîsî pê dima çekanê xo tadayî hetê Elçî. Goreyê raporî polîsan ra yewê ci sey kerdoxê muhtemel yê cînayetî ameyo dîyarkerdene.
Raporo ke hetê komêka pispor ra ameyo hadrekerdiş de yeno vatiş ke wexto ke Elçî ameyo qetilkerdiş kamera ameyî padayîş û vîdeoyê aye wextî nêameyî tespîtkerdiş û cok ra kerdoxî se ra se nêameyî tespîtkerdiş. Koma pispor dîyar kerde ke Elçî vîdeoyan ra 4 sanîye dima ameyo kiştiş. AMED
