Amadekariyên ji bo mîtînga ku dê di 9’ê sibatê de li Mêrsînê ji bo rakirina tecrîda li ser Ocalan bê lidarxistin hema hema bi dawî bûn. Hevserokên HDP’ê yên Mêrsîn û Edeneyê bang li hemû derdoran kirin ku tev li mîtîngê bibin û peyameke xurt bidin dewletê
Ji bo bal kişandina ser tecrîda girankirî ya li ser Rêberê Gelê Kurd Abdullah Ocalan, Partiya Demokratîk a Gelan (HDP) a Mêrsînê dê mîtîngê li dar bixe. Mîtîng dê di 9’ê sibatê de bi dirûşma ‘Edalet, azadî û demokrasî’ li Stadyûma Yevfîk Sirri Gur a Yenîşehîr a Mêrsînê bê lidarxistin. Tê payîn ku di mîtîngê de dê hevserokê HDP’ê Sezaî Temellî, berdevka Kongreya Demokratîk a Gelan (HDK) Gulîstan Kiliç Koçyîgît û hevserokê Kongreya Civaka Demokratîk (KCD) Berdan Ozturk jî amade bin.
Têkildarî mîtîngê, hevserokê HDP’ê ya Mêrsînê Mûstafa Işik axivî û diyar kir ku serlêdana wan a ji bo mîtîngê ji hêla walîtiyê ve hatiye qebûlkirin. Işik got ku xebatên xwe yên ji bo mîtîngê didomînin û ev tişt destnîşan kir: “Em li bendê ne ku ji Mêrsîn, Edene, Osmaniye û Hatayê bi dehhezaran kes tev li mîtîngê bibin. Em bang li hemû welatiyan dikin ku ji bo aştî, demokrasî, azadî û bidawîkirina tecrîdê biherikin qada mîtîngê.”
Dê xwedî li pêşeroja xwe derkevin
Işik anî ziman ku ev pêvajo, pêvajoya bilindkirina têkoşîna azadî û demokrasiyê ye û wiha derbirî: “Divê em li Leyla Guven xwedî derkevin. Em dibêjin ku em di vê pêvajoyê de dê xwedî li pêşeroja xwe, parlamenterên girtî, li bajarên xwe û li xwe xwedî derkevin. Divê gelê Çûkûrovayê ber bi qada mîtîngê ve biherike.”
Tevlêbûn girîng e
Hevserokê HDP’a Edeneyê Mehmet Erîg jî daxuyand ku wan gelemperiya amadekariyên xwe temam kirine û dê ji Edeneyê bi hezaran kes tev li mîtîngê bibe. Erîg diyar kir ku ev mîtîng pir girîng e û tevlêbûn çiqas xurt be, peyam jî dê ewqas xurttir bibe. Erîg bi lêv kir ku her kesên ku dixwazin dawî li tecrîda bînin divê tev li mîtîngê bibe. MÊRSÎN
