Rêxistina Rojnamegerên Sînornenas destnîşan kir ku li Îranê di 30 salan de 860 rojnamevan hatine binçavkirin, girtin û darvekirin
Rêxistina Rojnamegerên Sînornenas ku navenda wê li paytexta Fransa Parîsê ye, duh bi beşdariya parazvanên mafên mirovan, rojnamevan û aktivîstan, civîna çapemeniyê li dar xist û li ser binpêkirinên rojnamevanan ên li Îranê raporek aşkera kir.
Di rapora bi sernavê, “Derewên 40 salan ên Hikûmeta Îslamî ya Îranê, aşkerakirina dosyayek li ser dadweriya Îranê” de tê diyarkirin ku li ser milyonek û 700 hezar dosyayên di navbera salên 1980 û 2010’an de lêkolîn hatiye kirin. Di raporê de hat destnîşankirin ku dosya li ser binpêkirinên zindaniyên jin, zarok, zilam, kêmnetew, siyasetmedar û rojnamevanan hatine amadekirin.
Li gorî raporê, cara yekemîn e ku dosyayek wiha tê belavkirin. Di raporê de li ser binpêkirinên mafên rojnamevanan hat destnîşankirin ku di navbera 1980 û 2010’an de 860 rojnemevanan hatine girtin. Hat diyarkirin ku di nav van rojnamevanan de navê 4’an hatiye destnîşankirin ku hatine darvekirin. PARÎS
