Girtiyên bi navên Aydin Oguz û Serkan Erkavûs ku li Girtîgeha Tîpa E ya Gîresûnê tên girtin, ji bo rakirina tecrîda li ser Ocalan dest bi greva birçîbûnê ya bêdem û bêdorveger kirin
Ji bo rakirina tecrîda girankirî ya li ser Rêberê Gelê Kurd Abdullah Ocalan, bi pêşengiya hevseroka Kongreya Civaka Demokratîk (KCD) û parlamentera Partiya Demokratîk a Gelan (HDP) Leyla Guven, grevên birçîbûnê yên bêdem û bêdorveger hatin destpêkirin. Çalakiya Guven 101 roj li pey xwe hişt û rewşa wê jî her ku diçe giran dibe.
Di heman demê de bi heman boneyê li dehan girtîgehên bakurê Kurdistanê û Tirkiyeyê jî zêdetirî 301 girtiyên siyasî dest bi greva birçîbûnê yên bêdem û bêdorveger kir. Çalakiya zêdetirî girtiyan di roja 63’yemîn de didome. Greva birçîbûnê ya li girtîgehan pêl bi pêl jî mezin dibe. Her wiha çalakiya greva birçîbûnê ya bêdem û bêdorveger a Nasir Yagiz di roja 88’emîn de, ya li Strasboûrgê di roja 62’yemîn de û çalakiya Îmam Şîş jî di roja 62’yemîn de didome.
Çalakî berfireh dibe
Tevî çalakiyên grevên birçîbûnê yên bêdem û bêdorveger, di heman demê de li her çar parçeyên Kurdistanê û gelek welatên Ewropayê jî bi grevên birçîbûnê yên dorveger piştgirî tê dayîn.
Hat zanîn ku li Girtîgeha Tîpa E ya Gîresûnê jî girtiyên bi navên Aydin Ogûz û Serkan Erkavûs ji bo rakirina tecrîda girankirî ya li ser Ocalan ji 11’ê sibatê ve dest bi çalakiya greva birçîbûnê ya bêdem û bêdorveger kirine. GÎRESÛN
