Li Barselonaya herêma xweser a Katalonyayê, li dijî doza li Madrîdê ku alîgirên serxwebûnê lê tên darizandin, 500 hezar kes daketin kolanan
Li payetexta Spanyayê Madrîdê ev hefteyeke 12 rêveberên katalan ên alîgirên serxwebûnê ku di cotmeha sala 2017’an de serxwebûn ragihandibûn tên darizandin. Li dijî vê darizandinê, roja şemiyê li Barselonayê xwepêşandanek hate lidarxistin. Li gorî polîsan 200 hezar kes, li gorî organîzatoran jî 500 hezar kes tev li xwepêşandanê bûn.
Meş ji aliyê partiyên siyasî û komeleyên alîgirê serxwebûnê yên katalan ve hate organîzekirin. Di meşê de pankartên bi nivîsa ‘Diyarkirina çarenûsa xwe sûc nîne’ û ‘Azadî ji girtiyên siyasî re’ hatin hildan.
Meşa li Barselonayê çar roj piştî destpêkirina doza li Madrîdê pêk hat. 12 rêveberên alîgirê serxwebûnê, ji ber ku bi rengekî yekalî serxwebûn ragihandin tên sûcdarkirin ku fonên cemaweriyê ji bo nebaşiyê bi kar anîne û rê li ber raperînê vekirine. Tê xwestin ku ji 7 heta 25 salan bên cezakirin. Tê payîn ku doz ew ê sê mehan bidome. BARSELONA
