Namzedê Hemşaredarîyê Bajarê Girdî yê Amedî Selçuk Mizrakli dîyar kerd ke nizdîbîyayîşê weçînayîşî reyde Qayûmê Amedî Culami Atilla kewto mîyanê telaş û mulkê şaredarî bi hawayo bê qanûn dewrê Diyanet û Wezîrîya Karê Zerre keno.
Weçînayîşê Rayîrberanê Herêmî ke do 31ê Adare de pê bêro rê 40 rojî mend. Badê ke weçînayîşê herêmî kewt rojeve herêman de kay û hîleyê qayûm û AKPyî vejîyayî raşte. Nê kayan ra yew zî oyo ke Qayûm mulkê şaredarî dewrê dewlete keno. Derheqê babete de Namzedê Partîya Demokratîke ya Şaran (HDP) yê Hemşaredarîyê Bajarê Girdî yê Amedî Selçuk Mizrakli qisey kerd û bale ant babetanê muhîman ser. Mizrakli dîyar kerd ke nizdîbîyayîşê weçînayîşî reyde Qayûmê Amedî Culami Atilla ke bi Qeranameyê Hukmê Qanûnî (KHK) ame kar ser kewto mîyanê telaş û mulkê şaredarî bi hawayo bê qanûnî dewrê Diyanet û Wezîrîya Karê Zerre keno.
Mizrakli destpêkê qiseykerdişê xo de da zanayene ke qayûm 2 mal û mulkê şaredarî ke nînê neqlkerdene dewr kerdo û va: “Qayûm keyeyêko aîdê şaredarî ke nîno neqlkerdebe dewrê Qeymemîya Peyasî kerd û sewbîna mulko ke o zî nîno neqlkerdene zî dewrê Muftîtîya bajar kerd. Na rewşe teberê qanûn, usûl û raybazan a. Nizdîbîyayîşê weçînayîşî reyde mîyanê telaş û seke mal adir ra biremno lez keno. Malê ke ameyî dewrkerdene ra yew zî yê ke dewrê Karê Diyanet û dewrê Wezîrîya Karê Zerre bîyî yo. Malê ke nînê keqlkerdene dewrê Qeymemîya Peyasî û Muftîtîya bajarî kerd. Dîyar kerdî ke bi qerarê meclîs dewr kerdî. Labelê raşte de ne meclîs û ne zî qerarê meclîsî esto. Meclîs qet kom nêbî.”
Malê şaredarî ke nînê neqlkerdene dewr kerd
Mizrakli dîyar kerd ke qayûm mîyanê 2 serr û nîman de malê şaredarî ke bi kedêk gird ame awankerdene talan û wêran kerd û wina dewam kerd: “Butçeya şaredarî derbaz kerd. Hem mal û mulkê şaredarî talan kerd û hem zî malê şaredarî ke nînê neqlkerdene dewr kerd. Her çiqas ke ma hewl da ke tayê înan bivindernî zî xeylê înan tehsîs kerdî.”
Qayûm şaredarî heta qirik kerdo mîyanê deynan
Mizrakli qiseykerdişê xo yê peyênan de zî wina va: “Nizdîbîyayîşê weçînayîşî reyde mîyanê telaş û seke mal adir ra biremno lez keno. Taybet ma Sûr de bîyî şahidê na rewşe. Ma vîna ke 14 dîyî ke 14 parselê girdî ke nizdîyê 180 donim (hezar metrekare) senî pêşnîyazê hemkaranê xo kenî. Ma mudaxale kerd û vindarnayî. Şaredarîya Bajarê Girdî ya Amedî ameya rewşêka winasî ke nêeşkena krêdî bigîra. Hetê Dîwanê muhasabatî ra zî ame aşkerakerdene. Qayûm şaredarî heta qirik kerdo mîyanê deynan. Wexto ke şaredarî xesp bî sifir deynê ci estbî û kaseyê înan de 13 Mîlyon TL butçe estbî. Labelê nika talebê kredî daxî yeno redkerdene.” AMED
