Hêzên Rizgariya Efrînê li navçeyên Bilbil û Cindirêsê yên Efrînê û li gundê Kil Cibrîn ê Ezazê li dijî çeteyên dagirker çalakî pêk anîn
Hêzên Rizgariya Efrînê têkildarî çalakiyên şervanên xwe daxuyaniyek nivîskî weşand. Di daxuyaniyê de hate diyarkirin ku çalakiyên şervanên wan yên li dijî leşker û çeteyên artêşa tirk li Efrîn û derdora Efrînê didomin û ev tişt hatin parvekirin: “Di vê çarçoveyê de, şervanên me 17’ê Sibatê li navçeyên Efrîn û herêma Ezazê 3 çalakiyên bi bandor li dijî dagirkeran li dar xistin. Roja 17’ê sibatê şervanên me li navçeya Bilbilê ya Efrînê li dijî wesayîteke dewriyeyê ku leşker û çeteyên dewleta tirk a dagirker tê de bûn, çalakiyeke sabotajê li dar xistin. Di encama çalakiyê de leşkerek û 2 çete bi giranî birîndar bûn. Dîsa di heman rojê de li navçeya Cindirêsa ser bi Efrînê li dijî baregehek koma çeteyên Nûredîn Zenkgî çalakiyeke sabotajê hat lidarxistin. Di encama çalakiyê de li gel ku gelek çete mirin jî, di derheqê hejmara wan de agahiyên zelal bi dest neketin. Her wiha şervanên me li gundê Kil Cibrîn ê girêdayî Ezazê li dijî baregeheke koma çete ya bi navê Cebhe El-Şamiyê çalakiyeke sabotajê li dar xistin. Di encama çalakiyê de çeteyê bi navê Omer el Casim hat kuştin û çeteyê bi navê Mehmûd El Elî birîndar bû.”
