DBPyî Roja Ziwanê Dayîke fîraz kerd û dîyar kerd ke ganî hemverê polîtîkayanê asîmîlasyonî de mucadele bêro kerdeneû ziwan û kultur bêro pawitene.
Partîya Herêmê Demokratîkî (DBP) derheqê Roja Ziwanê Dayîke ya 21ê Sibate ya Dinya de eşkerayîyêk daye. Eşkerayîya ke bi ziwanê Kirmanckî (Zazakî) ameye dayene wina ya: “Goreyê raporê UNESCOyî pêroyîya Dinya de 7 hezar ziwanî yenî qisekerdene, la belê rewşa 3500 ziwanî ver bi qedîyîyayişî de ya. Taybetî hêzê dewlete yê neteweperest û hegemonîkî bi xêza yew ziwan û yew neteweyî ziwanê dayîke yê şaran rê nêz benî û seba qedînayîşê ziwanê dayîke yê şaran polîtîkayanê qirkerdişî rayra benê. Tirkîya de zî rewşa 18 ziwan û zaravayan ver bi qedînayişî de ya. Awanbîyayîşê Komara Tirkîya ra hetanê nê demî verba şarê Kurd û Kurdkî, hukmatê Komare, polîtîkayê lêmin ê asîmîlayon û înkarkerdişî rayra berdî û bi nê polîtîkayanê lêminan waşt ke ziwanê şarê Kurdî bihelînî. Tîfaqa lêmin a Hukmatê AKP û MHPyî bi polîtîkaya qeyûmî şarîdarîyê şarê Kurd xesp kerdî. Qeyûman zî verba ziwanê Kurdî, xebatê şarîdarî yê zaf ziwanî, sazîyê ziwanî yê şarê Kurdî de ferasetê yew ziwanî vistî dewreyî. Ziwan, kultur, tarîx û bîyayîşê şarê Kurdî yenî çinhesibnayene. Verba nê ferasetî sazîyê ma yê ke têkoşîn danî yenî hedefgirewtene û wazenî bi operasyonê qirkerdişî zî sazîyê demokratîkî bê xebat verdê. Ziwanê dayîke heme wareyê cuye de averberdiş û şuxilnayîş heqêko sifteyin o. Verba polîtîkayê dewlete yê asîmîlasyonî têkoşîndayîş û wayîrvejîyayîşê ziwan û kulturî zî heqêko sifteyin ê ma yo.”
Azadîya ziwanî, heqêko sifteyin o û hetanî ma heqê xo yê kulturî dest bifînê verba ferasetê qirkerdox û yewperestî de ma do têkoşînê xo rê bi biryarî dewam bikerê. Ma sifte 21ê Sibat a Roja Ziwanê Dayîke ya Dinya ya şarê Kurdî, bi pêroyîye zî Roja Ziwanê Dayîke ya heme şaranê Dinya pîroz kenî. Ma verba polîtîkaya qirkere heme dorûveran rê veng danî ke wa ziwanê şarê xo rê wayîr bivejî. AMED
