Karkerê madenî yê Zonguldakî heykelê karkerêkî madenî ke hetê karkeran ra ameyo viraştene û cinîyê herêma Deryayê Sîya şalêko herêmî dîyarîyê hemsereka KCDyî Leyla Guvena ke 107 rojî yo grevê vêşanîye de ya kerdî.
Çalakîya grevê vêşanîye yê bêdem û anêgêrayîşî ya hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena seba wedarnayîşê tecrîdê serê Rayberê PKKyî Abdullah Ocalanî dabî destpêkerdene roja 107. de dewam kena. Guvene badê ke 25ê Çele de Zindanê Amedî ra serbest ameye veradayene keyeyê xo yê taxa Bagcilarî ya Qezaya Rezan ya Amedî de çalakîya xo bi qerardarî dewam kena. Rayîrber û temsîlkarê komele û rêxistinan her roj şonî zîyaretê Guvene û piştî danî aye.
Rayîrberê HDPyî yê bajaranê Deryayê Sîya (Karadenîz) zî vizêr Guvene zîyaret kerdî. Zîyaret de dîyarîyî manîdar dîyayî Guvene. Karkerêko madenî ke Zonguldak de cuyeno heykelê karkerê madenî ke bi destê karkerêko madenî ameyo viraştene dîyarîyê Guvene kerd. Sewbîna cinîyê herêma Deryayê Sîya şalêko herêmî ke ê xebetnenî hemsereka KCDyî Leyla Guvene erşawitî.
Leyla Guvene daye zanayene ke seba dîyarîyê karkerê madenî û cinîyê Deryayê Sîya xeylê kêfweş a û va: “Dîyarîyê nê dostanê ma xeylê moral da mi. Ez xeylê kêfweş bîya. Piştîdayîşê winasî çalakî xurt kenî.” AMED
