Çalakiya greva birçîbûnê ya li Kelar a Germiyanê ji bo şikandina tecrîda li ser Ocalan tên destpêkirin belav dibin. Di vê çarçoveyê de mamosteyê bi navê Serdar Melih jî ji bo şikandina tecrîdê dest bi çalakiya greva birçîbûnê ya hefteyekê kir
Çalakiyên grevên birçîbûnê yên ji bo rakirina tecrîda girankirî yali ser Rêberê Gelê Kurd Abdullah Ocalan hatine destpêkirin, her ku diçe belav dibin. Di vê çarçoveyê li başûrê Kurdistanê ji Hewlêrê heta Mexmûr û Silêmaniyê, gelek kes di greva birçîbûnê de ne. Ji bo piştgiriya bi çalakiyên greva birçîbûnê re û şikandina tecrîda li ser Ocalan, li Kelar a Germiyanê jî mamosteyê bi navê Serdar Melih dest bi çalakiya greva birçîbûnê kir.
Li navçeya Kelar a ser bi îdareya Germiyanê ji bilî endezyar Herêm Mehmûd û mamosta Cuma Kerîm, îro jî mamostayê beşa werzîşê Serdar Melih jî dest bi çalakiya greva birçîbunê kir. Têkildarî çalakiyê Melih anî ziman ku armanca çalakiya wî, şikandina tecrîda li ser Ocalan e û wiha domand: “Ne ku Ocalan ji ber ku rêbereke kurdane min ev çalakiye daye destpêkirin, Ocalan beriya kurdbûnê pêşengê azadîxwazî û demokrasiyê ye.”
Rêbaza çalakiyê
Melih got ku wî dixwest çalakiya greva birçîbûnê ya bêdem û bêdorveger bide destpêkirin û wiha pê de çû: “Lê ji ber ku ez mamoste me û xwendekarê min hene, her wiha dayika min nexweşe û ez li wê dinihêrim, min nekarî greva bêdem û bêdorveger bidim destpêkirin. Dê jiyana min a rojane bidome lê dê hefteyekê di greva birçîbûnê de bim.”
Li Kelarê çalakî belav dibe
Hêjayî bibîrxistinê ye ku di 24’ê vê mehê de endezyarê bi navê Herêm Mehmûd ku xelkê navçeya Kelarê ye, li dijî tecrîda li ser Rêberê PKK’ê Abdullah Ocalan dest bi greva birçîbunê ya bêdem û bêdorveger kiribû. Çalakiya Herêm berdewam dike. Herwiha piştî Mehmûd, li heman navçeyê Cuma Kerîm jî ji bo hefteyekê dest bi greva birçîbunê kir. SILÊMANÎ
