Nasir Yagizo ke 99 rojî yo Hewlêr de grevê vêşanîye de yo, êdî hetê heşnayîş û dîyayîşî ra zehmetîye anceno.
Nasir Yagizo ke seba werdatişê tecrîdê serê Rayberê Şarê Kurdî Abdullah Ocalanî grevê vêşanîye de yo, rewşa weşîya ci her ke şina xirabêr bena. Goreyê zanayîşê ke doktoranê ey ra ameyê girewtene, Yagiz şewa Dişemeyî ra nata dejanê zereyî yê bişîdetan anceno.
Yagiz êdî hetê heşnayîş û vînayîş ra zehmetîye anceno. Doktoran ard ziwan ke, persa dîyayîşê Yagizî hîna bîya girane. Xora çend wextî yo Yagiz nêeşkeweno rakewo zî. Nê rojanê peyênan de persanê weşîye ra hewn çiman nêkeweno. Şodiranê eke kesêk leyê de nêbo nêeşkeno cila ra bivejîyo û payan ser nêeşkeno vindero. Yagizo ke tedawî red keno, ard ziwan ke qerardaro ke çalakîya xo bidomano. Seba ke rewşa ci her ke şina beno xirabêre, qesawetan zêdnena.
Grevê vêşanîye yê Yagizî, xoverrodayîşê grevê vêşanîye yê vera tecrîdkerdişê Rayberê Şarê Kurdî Abdullah Ocalanî rayberîya hemsereka Kongreya Komela Demokratîke (KCD) û parlamentera Partîya Demokratîke ya Şaran (HDP) ya Colemêrgî Leyla Guvene Zindanê Amedî de 8ê Teşrîna Peyêna 2018î de dest pêkerdîbî ra 13 rojî dima dest pêkerdibi.
Hewlêr de grevê vêşanîye yê Yagizî reyde grevê vêşanîyê biagêrayîşî zî yenê kerdene. Roja 97. ya grevî de gruba 49. grevê vêşanîye dewr girewtibi. Yagizî ra dima Başûrê Kurdistanî de qampê bextwaştoxan ê Mexmûrî de roja 20ê Çele de grevê vêşanîye yê bêdem û bêagêrayîşî amebi destpêkerdene. Grevê endama Meclîsê Îştare Fadîle Toke roja 39. de dewam keno. HEWLÊR
