TJAye grevê vêşanîye yê cinîyan ê vera tecrîdî silam kerde û seba tewrbîyayîşê çalakîyanê ke ê bi slogana ‘Cinî seba azadîye xoverdayîş de yê, cinîyî grev de yê’ do bivirazê veng daye.
Tevgerê Cinîyanê Azadan (TJA) derheqê 8ê Adare Roja Cinîyan ê Kedkaran a Dinya de eşkerayîyêk daye. Eşkerayîye de ame vatene ke, ê rayberê tarîxê têkoşînê cinîyan ê sey Clara, Rosa, Sara, Seve, Nûdeme û zaf hemrayê înan ê cinîyan ke xoverdayîşê înan mîras girewto emser bi slogana ‘Cinî seba azadîye xoverdayîş de yê, cinîyî grev de yê’ ê do 8ê Adare de wareyan de bibê.
Tevgerê Cinîyanê Azadan (TJA) tecrîdê serê Rayberê Şarê Kurdî Abdullah Ocalanî sey tecrîdê serê cimatî name kerd û va: “Nê tecrîdî welat kerdo binê tarîyîye. Grevê vêşanîye yê hemsereka KCDyî Leyla Guvene yê bêdem û bêagêrayîşî yo ke kewto roja 113., yê Sebahat Tuncele û Selma Irmake kewto roja 45., yê rojnamegere Kîbriye Evrene roja 75. de yo. 52 girewteyê cinîyê siyasetmedar û aktîvîstî bedenê xo danê verê vêşanîye û seba azadîya cimatkî cuye de israr kenê. Rayberîya cinîyan de reyna ters û xof o ke cimatî rê ameyo ferzkerdene, yeno şikitene.”
Seba tewrbîyayîşê çalakîyan vengdayîş
TJAye peynî de veng bi cinîyan kerde û va: “Ma veng bi heme cinîyan kenê tilîlîyan û renganê xo vera faşîzmî 8’ê Adare de mîtînganê Amed, Wan û Êlihî de têkoşînî gird bikerê. Vera qeyûmanê îşxalkeran ê ke wazenê destkewtîyanê ma cinîyan çin bikerê, 7ê Adare Wan de ma do pîya ‘Raporê Qeyûm ê Cinîyan’ eşkera bikerê. Zaf bajaran de ma do kartan hevalnê xo yê zîndanan rê bişawê. Reyna ma veng kenê ke hemê cinî tewrê zîyaret, rayraşîyayîşanê bi şemale, panêl, muzîk, goştarî, pêramotişê resiman, nawnayîşê fîlman bibê.” AMED
