Dêrazorî de oparasyonê HSDyî ke hemverê DAIŞî de dabî destpêkerdiş de heta nika 12 hezarî ra zêde sîvîlî ameyî xelisnayîş. Operasyon de bi hezaran çeteyê DAIŞî ke teslîm bîyî ra xeylê înan Konya, Bayburt, Mêrsîn, Stenbol û Anqara ra yî.
Dêrazorî de Hêzê Sûrîyeya Demokratîke (HSD) hemverê DAIŞî de operasyon dabî destpêkerdiş û no operasyon ver bi peynîbîyayîşî de yo. Selahîyetdarî eşkera kerdî ke heta nika 12 hezarî ra zêde sîvîlî ameyî xelisnayîş û taybet cinî û domanî cayanê asayî de yenî bicaakerdiş.
Operasyono ke dewa Baxozî ya girêdayeyê bajarokê Hecînî ya Dêrazorî de yeno meşnayîş de seba xelis û zirar nêdîyayîşê sîvîlan xebatêka hessas yena rayîrberdene. Hêzê şerkerdişî yê DAIŞî nêmendo û kom bi kom teslîmê HSDyî benî.
Xeylê endamê DAIŞî Rûsya, Ozbekistan, Iraq, Turkistan û Tacîkistanî ra yî. Sewbîna bihezaran endamê DAIŞî zî hemwelatîyê Tirkîye yî. Nê DAIŞî yê Tirkîye ra xeylê înan bajaranê sey Anqara, Stenbol, Bayburt, Konya û Mêrsînî ra yî.
DAIŞîyê ke teslîmê HSDyî benî kewenî objektîfan. Nê DAIŞîyan ra qismêk tewrê keye û merdimanê xo teslîmê HSDyî benî. Badê kontrolê cigêrayîşê şervananê HSDyî derbazê cayanê asayî yenî kerdiş. Endamê DAIŞî ke şer de birîndar bîyî zî yê sîvîlan ra yenî cîyakerdiş. Hem DAIŞê birîndar û hem zî sîvîlî kontrolê weşî ra yenî derbazkerdiş. DÊRAZOR
