Bi dirûşma ‘Jin ruhê jiyanê û alfabeya wêjeyê ne’ 4’emîn Mîhrîcana Wêje û Hunera Jinan li bajarê Qamişloyê dest pê kir
Li Hola Zana ya li bajarê Qamişloyê bi beşdarbûna 43 xebatên hunerî yên ji hemû pêkhateyên bakur û rojhilatê Sûriyeyê 4’emîn Mîhrîcana Wêje û Hunera Jinan bi dirûşma ‘Jin ruhê jiyanê û alfabeya wêjeyê ne’ dest pê kir.
Mîhrîcan bi deqeyeke rêzgirtinê dest pê kir. Bi navê Desteya Çand û Hunerê Nûr El Kiûd û bi navê Komîteya Amadekar a Mîhrîcanê Botan Hoşî axivîn. Di axaftinan de mîhrîcan li tevahî jinan hate pîrozkirin û berxwedana Leyla Guven hate silavkirin. Hate gotin ku bi saya berxwedana jinan di şoreşê de, berhemên wêjeyî yên jinan li bakur û rojhilata Sûriyeyê roj bi roj zêde dibin.
Paşê Koma Înana ya Suryan dîlanên folklorî û dengbêj Necah El Hesen jî stranên folklorî yên kurdî girêdayî herêma Koçerat pêşkêş kirin. Her wiha koma Şehîd Yekta Herekol a Kobanê şanoyek û Koma Kevana Zêrîn dilanên folklorî yên kurdî pêşkêş kirin.
Roja yekemîn a mîhrîcanê bi stranên Koma Kevana Zêrîn bi daw bû.
Her wiha dê mîhrîcan du rojan bidome. QAMIŞLO
