Berxwedêrê greva birçîbûnê Mûstafa Tûzak ku duh tevlî mîtînga li Kolnê bû, ji aliyê polîsan ve bi lêdanê hatibû binçavkirin
“Platforma Jiyanê ya li dijî Tecrîdê” ji bo şermezarkirina tecrîdkirina Ocalan doh li bajarê Koln ê Almanyayê meş û mîtîngek li dar xist. Ji berxwedêrên greva birçîbûnê Mûstafa Tûzak jî tevlî mîtîngê bû, lê belê ji aliyê polîsên alman ve bi lêdanê hate binçavkirin.
Wêneyê Rêberê Gelê Kurd Abdullah Ocalan ê li ser êleka ku Tûzak li xwe kiribû, weke hincet hate nîşandan. Tûzak ê ji aliyê dadgeha nobedar ve hate berdan, tevlî mîtîngê bû û axivî.
Tûzak piştî mîtîngê vegeriya Duisburgê ku greva xwe lê didomîne û ji aliyê doktor ve kontrola wî ya tenduristiyê hate kirin. Li ser bedena Tûzak şopa lêdanê hate tespîtkirin.
Nêzîkatiya polîsên alman a li hemberî çalakgerekî ku 49 roj in di greva birçîbûnê de ye, kiryarên polîsên tirk anî bîra mirovan. Tûzak diyar kir, wê ji ber vê kiryara li derveyî mirovahiyê û tundiyê serî li dadgeriyê bide. KOLN
