Li Baxozê di navbera şervanên HSD’ê û çeteyên DAIŞ’ê de şerekî giran diqewime. Rayedarê Buroya Navenda Çapemeniyê ya HSD’ê Mûstefa Balî diyar kir ku wan ji sê aliyan ve dor li çeteyan girtine û êdî ketine qonaxa dawî ya operasyonê
Operasyona şervanên Hêzên Sûriyeya Demokratîk (HSD) a li gundê Baxozê yê bajarokê Hecînê yê Dêra Zorê êdî di qonaxa dawî de ye. Hindik maye ku deverên dawî yên çeteyên DAIŞ’ê lê ne bên rizgarkirin.
Rayedarê Buroya Navenda Çapemeniyê ya HSD’ê Mûstefa Balî li ser rewşa dawî ya operasyonê ji ANF’ê re axivî û diyar kir ku çete li devereke biçûk asê mane. Balî ragihand ku ji sê aliyan ve dor li çeteyan hatiye girtin û wiha got: “Ya wê teslîmî şervanên me bibin, ya jî dê bên kuştin. Rêyeke din êdî li ber wan nemaye.” Balî anî ziman ku operasyon dê ji niha û pê ve bi paqijkirina qadê nedome û wiha got: “Ji ber ku li cihekî biçûk mane, ger teslîm nebin dê bi temamî îmha bibin.”
Di operasyona Baxozê de şervanên HSD’ê heta niha nêzî 17 hezar sivîl ji herêmê derxistin. Piştî ku sivîl li herêmên ewle hatin bicihkirin, şerekî dijwar dest pê kir û sê roj in bê navber didome. Tê gotin ku heta niha bi dehan çete hatine kuştin. DÊRA ZOR
