Şer û pevçûnên giran ên di navbera şervanên HSD’ê û çeteyên DAIŞ’ê yên li Baxozê didomin. Hat zanîn ku zêdetirî 200 çeteyên DAIŞ’ê yên biyanî ku gelek jê hemwelatiyên dewleta tirk in, xwe radestî şervanên HSD’ê kir
Operasyona şervanên Hêzên Sûriyeya Demokratîk (HSD) ya di çarçoveya qonaxa Şerê Tunekirina Terorê ya Pêngava Bagera Cizîrê de ji bo rizgarkirina gundê dawî yê di destê çeteyên DAIŞ’ê de daye destpêkirin, didome.
Li gorî nûçeya Ajansa Nûçeyan a Hawarê (ANHA), piştî şer û pevçûnên giran ên di navbera şervanên HSD’ê û çeteyên DAIŞ’ê de, zêdetirî 200 çeteyên DAIŞ’ê yên biyanî ku gelemperiya wan hemwelatiyên dewleta tirk û welatên asyayî ne, xwe rasdestî şervanên HSD’ê kir.
Hat zanîn ku li ser vê geşedanê, şervanên HSD’ê ji bo hejmareke kêm a sivîlan ku di ji hêla çeteyan ve weke mertalên zindî tên bikaranîn li wê eniyê şer da sekinandin. Di heman demê de ji bo ku sivîl bên rizgarkirin û çeteyên din jî teslîm bibin, şervanên HSD’ê amadekariya vekirina korîdorekê dikin. DÊRAZOR
