Parlementera HDP’ê Dersim Dag a ku li Amedê di greva birçîbûnê de ye, bersiv da Wezîrê Karê Navxweyî Suleyman Soylû yê ku talîamata binçavkirinê daye. Dag wiha got: “Em li vir in û berxwedana me didome.”
Bi armanca rakirina tecrîda li ser Rêberê Gelê Kurd Abdullah Ocalan Hevseroka KCD’ê Leyla Guven ev 117 rojin di çalakiya greva birçîbûnê ya bêdem û bêdorveger de ye. Ji bo rakirina tecrîda li ser Ocalan û piştevaniya berxwedana Guven li hemû zindanên bakurê Kurdistanê û Tirkiyeyê, li Strasboûrg, Galler, Hewlêr, Mexmûr, Toronto û gelek deverên din çalakiyên grevên birçîbûnê yên bêdem û bêdorveger pêş kitin. Li Amedê jî duh di nav de Parlamentera HDP’ê ya Amedê Dersim Dag jî di nav 6 HDP’iyan dest bi greva birçîbûnê ya bêdem û bêdorveger kirin. Çalakgerên ku dest grevê kirin ev in: Parlementera HDP’ê Dersim Dag, endamên HDP’ê Sevîcan Yaşar, Salîh Cansever, Îsmet Yildiz, Salîh Tekîn û Bîlal Ozgezer. Lê belê polîsan tirk piştî despêkirina çalakiyê bi çend saetan êrîşî çalakiyê kir û ji derveyî Dag, çalakgerên din binçav kirin. Parlementera HDP’ê Dag li avahiya HDP’ê û pênc çalakgerên din jî li nezaretxaneyê çalakiya xwe didomînin.
Piştî binçavkirina çalakgeran, Wezîrê Karê Navxweyî yê tirk Suleyman Soylû diyar kiribû ku talîmata binçavkirinê wî daye. Parlamente Dersim Dag nerazîbûn nîşanî vê binçavkirinê da û ev tişt anî ziman:“Tekane derdê Soylû bûye HDP û ev berxwedan. Nîşaneya herî mezin a tecrîdê ev e ku Wezîrê Karê Navxweyî fermanan dide dadgehan. Lê em li vir in û berxwedana me didome. Heta ku em encamê bistînin, dê berxwedana me bidome.”
Dag diyar kir ku li hemberî polîtîkayên dewleta tirk û qeyûman sê gelê kurd û gelên Tirkiyeyê di 31’ê adarê de bersiveke xurt bidin Wezîrê Karê Navxweyî Suleyman Soylû û Serokkomar Recep Tayyîp Erdogan. AMED
