Operasyona şervanên HSD’ê ya li Baxozê berdewam e. Hat zanîn ku di navbera şervanên HSD’ê û çeteyên DAIŞ’ê li du baskan şerekî dijwar rû dide
Qonaxa Şerê Tunekirina Terorê ya Pêngava Bagera Cizîrê ku şervanên Hêzên Sûriyeya Demokratîk (HSD) ji bo rizgarkirina navçeya Hecînê û gundewarên wê daye destpêkirin berdewam e. Çeteyên DAIŞ’ê yên ku tenê li gundê Baxozê asê mane, kom bi kom xwe radestî şervanan dikin.
Şervanên HSD’ê ji bo rizgarkirina temam gund jî di 1’ê adarê de ji sê hêlan ve operasyona dawî dabû destpêkirin. Operasyon berdewam e. Ji bo ku çeteyên DAIŞ’ê yên ku teslîmbûn û malbatên wan ji qada şer bên derxistin, baskekî operasyonê hate rawestandin. Di nava du rojan de bi hezaran DAIŞ’î û malbatên wan teslîmî şervanên HSD’ê bûn.
Lê belê gelek çeteyên ku qebûl nekirin teslîm bibin, bi sûîqestan, bi fuze û wesayîtên bombebarkirî hewl didin pêşî li pêşveçûna şervanên HSD’ê bigirin. Baskê rojhilat ê operasyonê ji bo veguhestinê hate rawestandin û korîdora veguhestinê hate vekirin. Li baskên bakur û başûrê rojhilat jî di operasyonê de şerekî dijwar diqewime.
Zêdetirî 10 hezar sivîl hatin veguhestin
Kameramanên ANF’ê li çeperên herî pêş ê baskê bakur ê operasyonê dîmenên şerê dijwar kişandin. Operasyonên veguhestina sivîlan, malbatiyên DAIŞ’iyan û DAIŞ’iyên teslîmî HSD’ê bûn, di 9’ê sibatê de dest pê kiribûn. Di veguhestinê de ku heta 1’ê adarê dewam kir, zêdetirî 10 hezr kes li herêmên ewle hatin bicihkirin.
Destpêkirina operasyonê
Di karê veguhestinê yê 20 rojan de nêzî 2 hezar çeteyên DAIŞ’ê yên biyanî û malbatên wan jî di nav de bi hezaran kes hatin veguhestin. Hêzên HSD’ê piştî bidawîbûna veguhestinê, di 1’ê adarê saet 18:00’an de dest bi operasyona li dijî çeteyên mayî yên li Baxozê kir. DÊRAZOR
