Nê rocanê ke propagandaya weçînayîşî bi heme germî û teraneya xo domêna merdimahî rayêke bîne bena şahidê dirîtî, nîjadperstî û bêwijdanîya partî û rayadaranê desthilatan. Hetêke semedê xobicakerdişê di şaredarîyan de her rayedarê partîyanê pergale cayêke ra fortanê xo erzenê û qalê averberdişê welatî, biratî, demokrasî, edaletî kenê, proje û plananê xo ser de estanekanê xo yê kan û newan qal kenê. Heto bîn ra zî bi seyan ewladê Kurdan semedê demokrasî, heq û hiqûqê merdimahî û edaletî dirhem dirhem canê xo danê helnayîşî!
Rayedarê dewlete ke maskeyê weçînayîşî dayo rîyê xo ser, hetêke sey ke tenê problem o yo ke weçînayîşê herêmî bidest bifînê qet grevê veyşanî nîyanê eyn û feslê xo ser, hetêke zî vernî ro partî û saziyanê Kurdan û şarê Kurdî zî gênê ke bale raya porêyî ya Tirkiye û ey dinya nêşoro grevê veyşanî ser û gamêke goreyê heq û hiqûqê merdimahî nêro eştişî. La hemverê heme pêkutî û bêedaletîya ke desthîlatî Kurdan ser de pêk ana roc bi roc ro înan zêdnena zî şarê Kurdî têkoşîna xo ya demokrasî, edaletî, têduştî û azadî ra fek verra nêdanê û ey zî roc bi roc têkoşîna xo hemverê desthilatan zêdnenê.
Nê rocê gerimanan de desthilatî di milan ra zordarîya xo pêk ana, şarê Kurdî zî di milan ra têkoşênê. Desthilatî û pergala faşîste ke milêke ra wazena talan û xespkarîya xo ya ke kalikanê xo ra mîras giroto bidomono milê bînî ra zî wazena bi gurrkerdişê neyartîya şarê Kurdî rê biarso talan û xespkarîya xo. Ma bi awayêke ecêb û seyr benê şahid ke senîn propagandayê xo yê weçînayîşî bê fikarî û bê fedî neyartîya Kurdan ser de denê rayraberdişî. Sankî raste de ne problemê aborî, ne yê heq û hiqûqî ne zî yê bêedaletî çinyo her mitînganê xo de neyartîya xo ya HDP’î û şarê Kurdî rê anê ziwan. Xo ra şaro ke fam bikero go rehet bivîno ke semedê bêedaltî û binkewtişo ke welat visto ci û têkşîyayîşê aborî bilimno bala şaranê Tirkiye wazeno bero cayêke bîn. La vatişê (Kurdistan Iraq de yo wa defê ewcayî bibê) ke serokomarê na desthilatî nê rocê peyînan de kerdo benîştê fekê xo fikrê dagirker û faşîzmî zehf akerde ramojneno.
No vatişê ey şiîrêke Mûrathan Mûnganî ke Kurdanê Başûrî ser de ke serra neway û yew de desthilatanê Iraqî ver warê xo ra qeweryaybî ûTirkiye ey Bakûr de qebûl kerdîbî ano merdimî vîr. Şiîrê ey wina yo, ‘kam kamî warê kamî ra qewerneno û kam kamî warê kamî rê qebûl keno?’ Bi rastî zî rêzêka trajîk û di ca de ya. Eyro zî kam wazeno kamî warê kamî ra biqewerno rewşêke seyr o. Û hemverê nê heme hewldayîşê faşîzmî Kurdî zî milêke ra têkoşîna xo ya semedê hakimkerdişê edalet, demokrasî, heq û hiqûqî û wedartişê tecrîd û binpêkerdişanê heqê merdimahî domenenê milê bînî ra zî wazenê bi têduştîya mîyanberê şaran nê talan û xespkarîya ke nê di serrê peyînan de zêdyawa raste ra wedarê.
Her çiqas Rayedarê na desthîlatî tenê neyartîya xo ya Kurdan rê anê ziwan zî esasê xo de na desthilatî neyarê heme şaran û xoza pîya wa û ma nê eşkenê her qada ciwîyînî de bivînê. Loma eyro têkoşîna ke şarê Kurdî hemverê înan dano têkoşîna heme şaran a. Têkoşînêka heme merdimahî rê ya, têkoşînêka xoza rê ya. Loma lazim o heme şarê ke Tirkiye de ciwîyenê destê xo bidê destê şarê Kurdî û biarsê edalet, demokrasî û têduştîya raştîne.
