Jinên Amedê û yên Wanê bi boneya 8’ê Adarê herikîn qadan. Di pîrozbahiyan de jinan berxwedana Leyla Guven a 121 roj in di greve de ye silav kirin. Leyla Guven jî peyamek ji Qada Îstisyonê ya Amedê re şand û wiha got: “Em ê mafê azadiyê bigîhînin asta herî jor.”
Platforma Jinan a Dîcle Amed (DKAP) bi wesîleya 8’ê Adarê Roja Jinan a Cîhanê li Qada Îstasyonê mitîng li dar xist. Mitînga bi dirûşma “Jin ji bo azadiyê li ber xwe didin û jin di grevê de ne” hat lidarxistin. Jin li Kolana Gevran a li Semta Ofîsê kom bûn û bi dirûşm û erbane û pankart û rengên xwe meşiyan Qada Îstasyonê. Ji gelek bajarên dordorê jî jin ji bo mitîngê hatin qadê.
Jinan di meşê de û li qadê bi dirûşma “Leyla Guven rûmeta me ye” çalakiya greva birçîbûnê ya Hevseroka KCD’ê Leyla Guven a 121 roj in li dijî tecrîdkirina Ocalan li ber xwe dide silav kirin. Jin li qadê li ber muzîkê govend digerînin û bênavber dirûşmên “Jin jiyan azadî”, “Bijî berxwedana zîndanan” û “Bê Serok jiyan nabe” berz kirin.
Hevseroka KCD’ê Leyla Guven jî peyam şand mitînga 8’ê Adarê ya li Amedê. Peyama Guven a ji aliyê Parlamentera HDP’ê ya Agiriyê Dîlan Dîrayet Taşdemîr ve hat xwendin wiha ye: “Merhaba jinên dilovan. Em di hefteya 8’ê Adarê de ne. Ez berxwedana 8’ê Adarê ya hemû jinên cîhanê û ya we pîroz dikim. Ez bi bawerim her roja nû 8’ê Adarê ber bi rojên azad ve bibe û mizgîniya azadiyê dide me. Em jin dê daxwazên civakê di qadên 8’ê Adarê de bînin ziman û qîr bikin. Her roj berxwedan mezintir dibe û têkoşîna me bilind dibe. Em ê mafê jinê yê di nava civakê de yên wek hiqûq û azadiyê bigihînin asat herî jor.”
Li Wanê jî pîrozbahiyên 8’ê Adarê hebû. Meclisa Jinan a Partiya Demokratîk a Gelan (HDP) û Tevgera Jinên Azad (TJA) bi minasebeta 8’ê Adarê Roja Jinan a Cîhanê li Parka Mûsa Anter mîtîng li dar xistin. Jin ji avahiya HDP’ê ya navçeya Rêya Armûşê û ji Avahiya Bajêr a HDP’ê ya Wanê ji du hêlan ve bi meşeke girseyî ketin qada mîtîngê. Jinên ku bi cil û bergên xwe yên reng bi reng ketin qadê bi hev re ketin qadê dirûşmên “Jin jiyan azadî” û “Bijî berxwedan Leyla” berz kirin û govend gerandin.
Hevseroka HDP’ê Pervîn Bûldan di pîrozbahiyê de axivî û berxwedana Leyla Guven silav kir. Bûldan bal kişand ser têkoşîna û berxwedana jinan a ji bo azadiyê. Bûldan, 8’ê Adarê li hemû jinan pîroz kir. AMED/ WAN
