Parlamentera HDPyî Salîha Aydenîze dîyar kerde ke vizêr şewe sereştişê awanîya partîya înan de polîsan bi paskilan dayî aye ro û dest ronayî telefonê aye ser
Awanîya Partîya Demokratîke ya Şaran (HDP) ya Amedî de parlamenterê HDPyî zî tede 10 kesî seba wedarnayîşê tecrîdê serê Rayberê PKKyî Abdullah Ocalanî grevê vêşanîye yê bêdem û anêgêrayîşî de yî. Polîsan reya diyîno ke erzenî awanî ser, hêrişê çalakgeran kenî û înan tepişenî. Polîsan berê teberî şikitî û kewtî zere. Parlamenterê HDPyî Wanî Tayîp Temel û Mûrat Sarisaçi derb kerdî û 7 çalakwanî tepiştî.
Sereştişê plîsan ra ver, parlementerê HDPyî verê berê awanî de nobete tepiştî. Polîsî bi lepat û paskilan parlementeran derb kerdî. Nê deqayan de parlementera HDPyî ya Amedî Salîha Aydenîze zî bi bi telefonê xo şîdetê polîsan ante. Polîso ke mudirê polîsan bî dest rona telefonê Aydenîze ser. No hedîse hetê sewbîna parlementerêk ra bi telefon ame antiş.
Aydenîz: Telefonê mi diznayî
Parlamenter Aydenîze derheqê hedîse de qisey kerde va: “Polîsan ma derb kerdî. Mudirê polîsan dest rona telefonê mi ser. Mudirê polîsan yê por sipî û verçimikî ferman da polîsan ke dest bironî telefonê mi ser. Mudir ferman da ke polîsî bi paskilan mo bikutî. Polîs telefonê mi destê mi ra remna û dizna.” AMED
