YSK’ê, li 7 navçeyên Amedê bi hinceta “ewlehiyê” cihê 70 sindoqan guherand û 14 sindoq jî kirin yek
Desteya Hilbijartinê ya Bilind (YSK), ji bo hilbijartina 31’ê adarê, di 5’ê adarê de li 7 navçeyên Amedê hin sindoq kirin yek û cihê hin sindoqan jî guherand. Piştî walîtiya Amedê, di 22’yê sibatê de serî li YSK’ê da û got, li deverên navborî pirsgirêka “ewlehiyê” heye, YSK’ê ev biryar girt.
YSK’ê, li navçeya Pasûrê cihê 35 sindoqên ku hejmara hilbijêrên wan 7 hezar û 578 kes in, li navçeya Pîranê cihê 7 sindoqên ku hejmara hilbijêrên wan hezar û 48 hilbijêr in, li navçeya Hênê scihê sindoqeke ku hejmara hilbijêrên wê 231 kes in, li navçeya Hezroyê cihê 10 sindoqên ku hejmara hilbijêrên wan hezar û 953 hilbijêr in, li navçeya Licê cihê 5 sindoqên ku hejmara hilbijêrên wê hezar û 145 kes in, li navçeya Farqînê cihê 7 sindoqên ku hejmara hilbijêrên wê hezar û 308 kes in û li Bismilê jî cihê 5 sindoqên ku hejmara hilbijêrên wê 224 kes in guherand. Her wiha li navçeya Licê jî 14 sindoqên ku hejmara hilbijêrên wan 2 hezar û 398 kes in kirin yek.
Desteya Hilbijartinê ya Navçeya Pîranê, di 8’ê sibatê de bi hinceta “ewlehiyê” biryar girtibû ku 13 sindoqên li taxên cuda bên yekkirin. Li ser vê HDP’ê li Desteya Hilbijartinê ya Bajêr îtiraz kir û biryar hatibû betalkirin. Piştî vê Desteya Hilbijartinê ya Pîranê careke din heman biryar girtibû. HDP’ê vê carê serî li YSK’ê dabû û YSK’ê gotibû ev biryar ne biryareke qanûnî ye û betal kiribû. Lê hîn di ser re mehek derbas nebû, YSK’ê vê carê bereksê biryara xwe ya berê biryarek girt. AMED
