Hevserokê HDP’ê Sezaî Temellî, li bajaroka Elîgor a Navçeya Pirsûsê ya Rihayê bi coş û girseyek mezin hat pêşwazîkirin
Hevserokê HDP’ê Sezaî Temellî, di çarçoveya xebatên hilbijartinê de li navçeya Pirsûs a Rihayê bi gel re civiya. Temellî li bajaroka Elîgor a Pirsûsê ji hêla rihayiyan ve bi coşeke mezin hate pêşwazîkirin. HDP’iyên xwestîn tev li konvoyê bibin ji hêla leşkeran ve hatin rawestandin. Piştî nîqaşa di navbera HDP’yî û leşkerên tirk de destûr hat dayîn ku konvoy derbas bibe. Temellî bi konvoyê hat bajaroka Alîgorê û li vir ji hêla girseya ku ji jin, zarok û niştecihên bajarokê ve hat pêşwazîkirin. Gel li pêşiya otobusa hilbijartinê ya Temelli tê de bû meşiya û bi dirûşman piştgiriyên xwe ji bo HDP’ê anîn ziman. Temellî li vir konvoy sekinand û bi gel re govend gerand.
Temellî xîtabî gel kir û diyar kir ku li her derê pêşwaziyên gel vediguherin mîtîngan û wiha got: “Çiqas dixwazin bi wî zimanê xwe yê bi jehr bila jehrê vereşin. Em ê li hemberî xirabiyê têkoşîna başiyê bidin. Bi dijminatiya vî gelî, bi tunehesibandina wî, li Tirkiyeyê bi tunekirina aştiya civakî re dibêjin qey dê li ser desthilatdariyê bimînin.”
Piştî axaftinan buroya hilbijartinê hat vekirin û Temellî û heyeta kup ê re derbasî navçeya Pirsûsê bûn. RIHA
