Girtiyên li Girtîgeha Şakranê ya Tîpa T a Hejmar 2 ku ji 1’ê Adarê ve dest bi greva birçîbûnê ya bêdem û bêdorveger kirine, di peyama ku bi rêya malbatên xwe şandin de wiha gotin: “Divê kesên li derve bêdeng nemînin. Êdî ne bes e ev bêdengî?”
Çalakiya greva birçîbûnê ku li girtîgehan hat destpêkirin ji 1’ê Adarê ve li hemû girtîgehan belav bû. Peyamên girtiyan ên ji bo derve ku dişînin berdewam dikin. Li girtîgeha Tîpa T ya Şakrana Îzmîrê ya hejmar 2, 55 girtiyên di greva birçîbûnê ya bêdem û bêdorveger de ne bi rêya malbatên xwe peyam şandin.
Girtiyên bi navê Cengîz Dogan, Mehmet Yavuz, Necdet Kaya û Serhat Çetîner di peyama xwe de bal kişandin ser berxwedana ku hatine destpêkirin û wiha gotin: “Heta ku tecrîd bi dawî nebe dê çalakiya me jî bi dawî nebe. Em bi hêvî û biryar in, em ê bi ser kevin. Em li vir di berxwedanê de ne û heta dawî em ê li ber xwe bidin. Divê kesên li derve bêdeng nemînin. Êdî ev bêdengî ne bes e? Bila mirov li qadan jî xwedî li berxwedanê derkevin.” ÎZMÎR
