Li Stenbolê Komcivîna Jinan a Karkeran hat lidarxistin û ji gelek bajarên Tirkiyeyê jin beşdar bûn. Ji jinên kedkar Nûrten Karahanci di komcivînê de axivî û wiha got: “Nabe ku rizgariya jinê ji rizgariya civakê cuda bê destgirtin.”
Jinên Kedkar (EKA), li Navenda Giştî ya Sendîkaya Kar Petrol a li Altûnîzade ya Stenbolê Komcivîna Jinan a Karkeran li dar xist. Ji gelek bajarên Tirkiyeyê jin beşdarî komcivînê bûn. Piştî deqeyek rêzgirtinê komcivînê destpê kir. Ji jinên kedkar Nûrten Karahanci axaftina vekirinê ya komcivînê kir.
Karahanci diyar kir ku kapîtalîzm êrîşî hemû beşên li dijî xwe dike û wiha got: “Ji ber vê nabe ku rizgariya jinê ji rizgariya civakê cuda bê destgirtin. Pergala kapîtalizmê, tu carî azadiyan bi jinan nade qezenc kirin. Encex bi bilindkirin a têkoşînê em karibin azadiya xwe bi dest bixin.”
Karahanci da zanîn ku pirsgirêkên heyî kûr û jiyanî ye û wiha axivî: “Çareseriya van pirsgirêkan jî ewqas bi kok û jiyanî ye. Em ê bi hevre vê pêvajoyê derbas bikin, biguherînin û veguherînin.”
Piştî axaftina vekirin, jinên beşdarî komcivînê bibû yek bi yek xwe dan nasandin. Dûre jinan yek bi yek mafê axaftinê girtin û ji bo pirsgirêkên dijîn, pêşniyarên çareseriyê pêşkêş kirin. Pişt re jî şanogerên ciwan, lîstika binavê Bekoder pêşkêş kirin. STENBOL
