Ji fermandarên HSD’ê Rûstem Hesekê diyar kir ku çeteyên DAIŞ`ê derketina sivîlan a ji Baxozê asteng dikin
Qonaxa Şerê Tunekirina Terorê ya Pêngava Bagera Cizîrê ku şervanên Hêzên Sûriyeya Demokratîk (HSD) ji bo rizgarkirina navçeya Hecînê û gundewarên wê daye desptêkirin, didome. Çeteyên DAIŞ’ê yên ku tenê li gundê Baxozê asê mane, ji hêla şervanan ve hatine dorpêçkirin. Çeteyên ku kêliyên xwe yên dawiyê dijîn, sivîlên ku dîl girtine jî weke mertalên zindî bikartînin.
Têkildarî rewşa Baxozê ji fermandarên HSD’ê Rûstem Hesekê axivî. Hesekê destnîşan kir ku operasyonên hêzên wan ên ji bo rizgarkirina sivîlên di destê çeteyên DAIŞ’ê de berdewam in û ev agahî dan: “Piştî ku HSD’ê gelek sivîl ji gundê Baxozê derxistin, çeteyên DAIŞ’ê destûr nadin ku sivîlên di destê wan de ji gund derkevin. Ji ber vê yekê jî operasyon dereng dikeve.”
Rûstem Hesekê daxuyand ku malbatên çeteyan ên niha di Baxozê de mane, tevî hemû hewldanan jî çete nahêlin derkevin û wiha dawî li axaftina xwe anî: “Hemle niha hatiye rawestandin. Em hewl didin ku hemû malbatan ji gund derxînin. Bi derxistina malbatan re jî hêzên me dê yekser bikevin gund û rizgar bikin.” DÊRAZOR
