Xoverdayîşê Nasir Yagizî yê hemverê tecrîdkerdişê Rayberê Şarê Kurdî Abdullah Ocalanî roja xo ya 110ine de yo. Rixmo ke halê ê yê weşîye xirab o zî Yagiz vano, serkewtiş ê înan o
Grevê vêşanîye yê endamê HDPyî yê Hewlêrî Nasir Yagizî yê hemverê tecrîdî û seba bicaameyîşê azadîya Rayberê Şarê Kurdî Abdullah Ocalanî roja 110ine de dewam keno. Ancî bi hawayêkê hemwextî grevo bêdem û biagêrayîş ê koma 55ine zî dewam keno.
Pîya bi halê xo yê xirabî Nasir Yagizî ma rê behsê hîkayeya xo ya xoverdayîşê xo yê 110 rojan ke hewna dewam kena kerd.
Hêzê cinî cesaret da mi
Yagizî sere de ard ziwan ke seba ke bibo vengê qîrayîşê Leyla Guvene ya ke serkêşîye prosesî rê û şorişêkê neweyî rê kerde, dest bi grevê vêşanîye kerdo. Ancî Yagizî da zanayene ke hêzê cinîya Kurde cesaret dayo ê ke gamêka winayêne bierzo û dest bi rayraşîyayîş û maratonê dergî bikero. Yagizî vat ke prosesêko derg û dila ame ravêrtene û nê prosesî de serdanê şarî, ancî serkewtişê YPJyî yê hemverê çeteyanê DAIŞî îrade û bawerîya ê hîna kerdê xurt. Yagizî vat şorişê Rojawanî bi destê cinî ame awankerdene û bi şorişêko zaf-kulturî.
Grev başûr de vila beno
Pîya bi çalakîya Yagizî grevê vêşanîye Başûrê Kurdistanî de zî veng da. Muhendîs Herêm Mehmûd zî 24’ê Sibate ra grevê bêdem û bêagêrayîşî de yo. Ancî Şeyma Ednane 3’ê Adare de dest bi nê grevî kerdo. Verê nê zî 25’ê Sibate de şêwekar Cuma Kerîmî, 26’ê Sibate de mamosta Serdar Melîhe dest bi grevê vêşanîye yê yew hewteyî kerdibi. Yagizî bale ante serê vilabîyayîşê grevanê vêşanîye ser û vat şexsê Herêm Mehmûd û Şeyma Ednane de rastîya mucadeleyê azadîya Kurdistanî hîna zaf yena famkerdene.
Azadîya serekê xo wazenê
Nasir Yagizî ard ziwan ke seke roja ewilêne ra Ocalan vano; ‘Ya/yo ke şer bikero azad bena/o, ya/yo ke azad bena/o xasek bena/o, ya/yo ke xasek bena/o yena/o heskerdene’ sey sondêkê cuye xo rê vînayo û bîyo çimeyê hêzê mucadelekerdişî. Yagizî vat waştişê înan waştişêko rewa yo û yê cimatî yo û wina qisey kerd: “Ma tena qedînayîşê tecrîdê nê, wazenê ke Serekê ma bibo azad zî. Bi nê amacî ma dest bi çalakîye kerd.”
Ti astengî nêşkena vernîya xeyalê mi bigîro
Yagizî bale ante serê halê xo yê weşîye ser û vat her roja ke şina tena bedenê mi nê, bedenê heme hemrayanê min ê ke nê rayraşîyayîşê serkewtişî de ca girewtê helêno û wina dewam kerd: “Tu astengî nêeşkena mi xeyalê min ê ke bi hawayêkê azadî Rayber Apoyî dir biciwîyî ra açarno! Rast o, hendî nêeşkena hurzî xo ser, wucûdê mi dejeno, la serkewtiş umîd dano mi. Roja yewine ra heta nika coş û moralê mi berz o.
Nêeşkeno rakewo
Her roja ke şina, bêtaqetî û dejê serreyî hîna beno vêşî, çimê mi ge-ge benê tarî û nika tewr zaf dejê serreyî û bêhewnî zor danê mi. Mîyanê roje de ez eşkena tena 2-3 saetan rakewî. Gama ke rakewena zî heta saetanê dimayê nîmerojî nêeşkena bibî haya. Dimayo ke bena haya, qasê heta saetêk wucûdê mi ancax eşkeno tayê bêro xo ser. Eke bi hemkarîya hemrayan nêbo, ez nêeşkena hurzî. Ê kewenê binê çenganê mi û ez eşkena tayê rayra şirî.”
Amacê xo înan rê qal keno
Serdanê hemwelatij û sazîyan ê seba çalakîye zî bêmabên dewam kenê. Bi heman hawayî Nasir heta ê dest ra yeno wazeno kesê ke yenê serdane bivîno. Yagizî ard ziwan ke rojanê ewilênan de heta ke ê dest ra ameyêne her kesê ke ameyêne serdana ci înan dîyêne û terraqe kerdêne. La nika gama ke kesî yenê serdana ci, eke bieşko bi hetkarîya hemrayanê xo înan vîneno û keno ke rixmê giranîya halê xo de zî halê înan biperso û umîdê serkewtişî înan dir pare bikero.
Eke bedel nêro dayene aşitî nêna
Nasir Yagizî vat ke ganî waştişê înan ê şikitişê tecrîdî Newroze de hîna xurt bibê û wina qisey kerd: “Ganî şarê ma bi ruhê serewedartoxî yê Kawayê Hemdemî ke hemverê zulmî de vejîya, vejîyê meydanan û adirê Newroze xurt bikerê. Bi yewîye û paştîdayîşî peynîya nê zulmî bîyarê. Bi serkêşîya cinî û ciwananê şorişgêran de meydanan de bê. Ganî ma na yewe rind bizanê, bê bedel ne azadî ne zî aşitî bena. Heta bedel nêro dayene ne aşitî ne zî azadî bica yena. Tecrîd nêqedêno.”
Roja 8ê Adare de Nasirî Leyla Guvene, Sebahat Tûncele, Selma Irmake, Kîbrîye Evrene û Dêrsim Dage rê name şirawit.
Serdanê partî û sazîyan
Mîyanê nê 110 rojan de bi desan sazî û organîzasyonê cimatê sivîlî yê sey KNK, Goran, PYD, Hîzbî Zehmetkêşanî Kurdistan, Hîzbî Şîî, Bizavî Demokratîk û Şarê Kurdistanî, Partîya Kumunîste ya Kurdistanî, Kongreya Star, Îdareyo Xoser ê Vakûr û Rojakewtena Sûrîye, Hemserekê Herêma Cizîre Ebdulkerîm Saroxan, Hîzbî Demokratî Îran, Partîya Yewîya Demokratîke ya Sûrîye, YNK, Partîya Parêzeran, Tevgera Azadî, ancî Mamostayê Zanko Dr. Qasim Merzanî, Mamosta Idrîs Sadiq, nûştox Kawa Nadir û bi desan hemwelatijî yê çar perçeyanê Kurdistanî ra serdana ê kerde.
Bi heman hawayî heta nika nêzdîyê 450 kesî çar perçeyanê Kurdistanî ra tewrê çalakîya grevê vêşanîye yê bêdem û biagêrayîşî bîyê. HEWLÊR
